പയ്യോളി: പോലീസ് സ്റ്റേഷൻ പരിധിയിൽ മോഷണ പരമ്പര തുടരുന്നു. അയനിക്കാട് മമ്പറം ഗേറ്റ്, ഇരിങ്ങൽ റെയിൽവേ സ്റ്റേഷൻ എന്നിവയ്ക്ക് സമീപത്തുള്ള വീടുകളിലാണ് മോഷണം നടന്നത്.
അയനിക്കാട് കളരിപ്പടി മമ്പറംഗേറ്റ് ഭഗവതി കോട്ടക്കൽ ക്ഷേത്രത്തിന് സമീപം തലപ്പനങ്ങാട്ട് ബാബു, ഇരിങ്ങൽ റയിൽവേ സ്റ്റേഷന് സമീപം കാപ്പുംകര ആനാടക്കൽ പരേതനായ ഭാസ്കരൻ്റെ വീട്ടിലുമാണ് കള്ളൻ കയറിയത്. ഇന്ന് പുലർച്ചെ 2 ഓടെയാണ് സംഭവം.
ബാബുവിൻ്റെ വീടിൻ്റെ പൂട്ട് പൊളിച്ചാണ് മോഷ്ടാവ് അകത്തു കടന്നത്. അകത്തുണ്ടായിരുന്ന മേശ തുറന്ന് പരിശോധിച്ചപ്പോഴേക്കും വീട്ടുകാർ ഉണർന്നെന്ന് മനസ്സിലാക്കിയ മോഷ്ടാവ് രക്ഷപ്പെടുകയായിരുന്നു.
ഇരിങ്ങലിൽ പരേതനായ ഭാസ്കരൻ്റെ വീടിൻ്റെ ഓട് പൊളിച്ച് അകത്ത് കടക്കാൻ ശ്രമിക്കുന്നതിനിടെ ശബ്ദം കേട്ട്
മക്കളായ നിധിനും അതുലും എഴുന്നേറ്റതോടെ മോഷ്ടാക്കൾ കടന്നുകളയുകയായിരുന്നു. പിന്നാലെ ഓടിയെങ്കിലും മോഷ്ടാക്കളെ പിടികൂടാൻ കഴിഞ്ഞില്ല. നാലുപേരോ അതിൽ കൂടുതലോ മോഷ്ടാക്കൾ ഓടി മറയുന്നത് ശ്രദ്ധയിൽ പെട്ടതായാണ് വിവരം.
അതേ സമയം, ഇന്ന് നാലോളം വീടുകളിലാണ് മോഷ്ടാക്കളെത്തിയത്. അയനിക്കാട് 24-ാം മൈലിൽ പെരുവോളിക്കുനി കെ ടി പ്രജീഷിൻ്റെ ഹീറോ ഗ്ലാമർ ബൈക്ക് മോഷണം പോയി. മോഷ്ടാക്കളെത്തിയ നാല് വീടുകളും റെയിലിന് സമീപമാണെന്നതാണ് പ്രത്യേകത. പ്രദേശത്ത് ഒരു മാസത്തിനിടെ നിരവധി മോഷണങ്ങളാണ് നടന്നിട്ടുള്ളത്.
Discussion about this post