പയ്യോളി: തിക്കോടിയിൽ യുവാവിന് മലേറിയ കണ്ടെത്തി. തിക്കോടി റെയിൽവേ സ്റ്റേഷനു സമീപം താമസിക്കുന്ന മധ്യപ്രദേശ് സ്വദേശിക്കാണ് മലേറിയ രോഗബാധ കണ്ടെത്തിയത്. നിർമാണ മേഖലയിൽ ജോലി ചെയ്യുന്ന യുവാവിനാണ് മലേറിയ ബാധിച്ചത്. ഇവിടെ അതിഥി തൊഴിലാളികളായ 15 ഓളം പേർ ഒന്നിച്ച് താമസിക്കുന്നുണ്ട്.
ഇവരിലൊരാൾപനി ബാധിച്ചതിനെ തുടർന്ന് പയ്യോളിയിൽ വർഷങ്ങളായി പ്രാക്ടിസ് ചെയ്യുന്ന ബിഹാറിൽ നിന്നുള്ള ഡോക്ടറെ കാണുകയും പരിശോധനയ്ക്ക് വിധേയമാവുകയും ചെയ്തതോടെയാണ് മലേറിയ രോഗം ബാധിച്ചതായി സ്ഥിരീകരിച്ചത്. രോഗവിവരം ഡോക്ടർ പയ്യോളി നഗരസഭ ആരോഗ്യ സ്ഥിരം സമിതി അധ്യക്ഷ കെ ടി സിന്ധുവിനെ അറിയിക്കുകയായിരുന്നു.
ഈ വിവരം തിക്കോടി പഞ്ചായത്ത് പ്രസിഡൻ്റ് ഒ കെ ഫൈസൽ, സ്ഥിരം സമിതി അധ്യക്ഷൻ അജ്മൽ മാടായി എന്നിവർക്ക് കൈമാറുകയായിരുന്നു. തുടർന്ന്, ആരോഗ്യ വകുപ്പ് അധികൃതർ ഇവർ താമസിക്കുന്ന ക്യാംപിലെത്തി പ്രതിരോധ പ്രവർത്തനങ്ങൾ നടത്തി. മറ്റുള്ളവരുടെ രക്ത സാംപിളുകൾ ശേഖരിച്ചു. ഇവരെ നിരീക്ഷണത്തിലാക്കിയിട്ടുണ്ട്.
Discussion about this post