തിരുവനന്തപുരം: സ്ത്രീകള്ക്കെതിരായ അതിക്രമങ്ങളും സ്ത്രീധന പീഡനങ്ങളും തടയാന് പ്രത്യേക ടാസ്ക് ഫോഴ്സ് രൂപീകരിച്ച് സര്ക്കാര് ഉത്തരവായി. ഇന്റലിജന്സ് അസിസ്റ്റന്റ് ഇന്സ്പെക്ടര് ജനറലിന്റെ (എ.ഐ.ജി) നേതൃത്വത്തിലായിരിക്കും പുതിയ സംവിധാനം പ്രവര്ത്തിക്കുക. ഗാര്ഹിക പീഡന കേസുകളില് വേഗത്തില് അന്വേഷണം പൂര്ത്തിയാക്കി ഇരകള്ക്ക് നീതി ഉറപ്പാക്കുകയാണ് ലക്ഷ്യം.
വനിത ശിശുവികസന വകുപ്പും സംസ്ഥാന പൊലീസ് മേധാവിയും സമര്പ്പിച്ച ശിപാര്ശകള് പരിശോധിച്ച ശേഷമാണ് ആഭ്യന്തര വകുപ്പ് ഇതുസംബന്ധിച്ച ഉത്തരവ് പുറപ്പെടുവിച്ചത്. ഇന്റലിജന്സ് എഐജി അനുജ് പലിവാളിനാണ് പദ്ധതിയുടെ ചുമതല. സ്ത്രീധനവുമായി ബന്ധപ്പെട്ട പരാതികളിലും ഗാര്ഹിക പീഡന കേസുകളിലും സമയബന്ധിതമായ നടപടി ഉറപ്പാക്കാന് പുതിയ സംവിധാനത്തിലൂടെ സാധിക്കും.
ജില്ലാതലത്തില് പ്രവര്ത്തിക്കുന്ന വിവിധ വകുപ്പുകളെ ഏകോപിപ്പിച്ചാണ് സ്പെഷ്യല് ടാസ്ക് ഫോഴ്സ് പ്രവര്ത്തിക്കുക. ജില്ലാ വിജിലന്സ് കമ്മിറ്റി, ജില്ലാ വനിത സെല്, സഖി വണ് സ്റ്റോപ്പ് സെന്റര്, ലീഗല് സര്വീസസ് അതോറിറ്റി, വനിത ശിശുവികസന വകുപ്പിന്റെ ജില്ലാ ഓഫിസ് എന്നിവിടങ്ങളില് നിന്നുള്ള പ്രതിനിധികള് സമിതിയുടെ ഭാഗമാകും. ഇതിനുപുറമെ ഒരു വനിത പ്രതിനിധിയെയും ടാസ്ക് ഫോഴ്സില് ഉള്പ്പെടുത്തുമെന്ന് എഐജി വ്യക്തമാക്കി.
സംസ്ഥാനത്ത് സ്ത്രീധനത്തിന്റെ പേരിലുള്ള അതിക്രമങ്ങള് വലിയ തോതില് വര്ധിച്ചുവരികയാണ്.കേന്ദ്ര ആരോഗ്യ കുടുംബക്ഷേമ മന്ത്രാലയം പുറത്തുവിട്ട ഏറ്റവും പുതിയ ദേശീയ കുടുംബാരോഗ്യ സര്വേ കണക്കുകള് പ്രകാരം കേരളത്തിലെ സ്ത്രീകളുടെ ഗാര്ഹിക സുരക്ഷ സംബന്ധിച്ച് ആശങ്കാജനകമായ വിവരങ്ങളാണ് പുറത്തുവരുന്നത്.
പങ്കാളിയില് നിന്നുള്ള ശാരീരികമായ മര്ദനം, കടുത്ത പരിക്കേല്പ്പിക്കല്, നിര്ബന്ധിത ലൈംഗിക അതിക്രമങ്ങള് എന്നിവയെല്ലാം ഗാര്ഹിക പീഡനത്തിന്റെ പരിധിയില് വരും. ഏറ്റവും സുരക്ഷിതമാകേണ്ട വീടുകള് തന്നെ പലര്ക്കും ഭയത്തിന്റെ കേന്ദ്രമായി മാറുന്ന സാഹചര്യമാണുള്ളത്. സാമൂഹിക വികസനത്തിലും വിദ്യാഭ്യാസത്തിലും സ്ത്രീ മുന്നേറ്റത്തിലും എപ്പോഴും മാതൃകയായി ചൂണ്ടിക്കാണിക്കപ്പെടുന്ന കേരളത്തില് പങ്കാളിയില് നിന്നുള്ള അതിക്രമ നിരക്ക് 17.7 ശതമാനമാണ്.നൂറില് 18 സ്ത്രീകള് സംസ്ഥാനത്ത് ഗാര്ഹിക പീഡനം നേരിടുന്നുണ്ട്.
ഇതിനെതിരെ കര്ശന നടപടികള് സ്വീകരിക്കാനാണ് സര്ക്കാര് ഒരുങ്ങുന്നത്. സ്ത്രീധന പീഡനവുമായി ബന്ധപ്പെട്ട ആത്മഹത്യകള് രാജ്യത്ത് വര്ധിച്ചുവരുന്ന സാഹചര്യത്തില് കൂടിയാണ് സര്ക്കാരിന്റെ ഈ നിര്ണായക ഇടപെടല്. നാഷണല് ക്രൈം റെക്കോര്ഡ്സ് ബ്യൂറോയുടെ കണക്കുകള് പ്രകാരം ഓരോ വര്ഷവും ആയിരക്കണക്കിന് സ്ത്രീകള്ക്കാണ് ജീവന് നഷ്ടപ്പെടുകയും സ്ത്രീധനത്തിന്റെ പേരില് പീഡനത്തിന് ഇരയാകുകയും ചെയ്യുന്നത്.
വിദ്യാസമ്പന്നര്ക്കിടയിലും ഉയര്ന്ന പദവിയിലുള്ള ഉദ്യോഗസ്ഥര്ക്കിടയിലും ഇത്തരം സംഭവങ്ങള് ഉണ്ടാകുന്നത് ഗുരുതരമായ സാമൂഹിക ആശങ്കയാണ് ഉയര്ത്തുന്നത്. സ്ത്രീധന നിരോധന നിയമം കര്ശനമായി നടപ്പാക്കുന്നതിനൊപ്പം ബോധവത്കരണ പരിപാടികളും ഊര്ജിതമാക്കാന് വനിത ശിശുവികസന വകുപ്പ് ലക്ഷ്യമിടുന്നുണ്ട്. പരാതി നല്കാന് മടിക്കുന്ന സ്ത്രീകള്ക്ക് ധൈര്യപൂര്വം മുന്നോട്ടുവരാന് പുതിയ സംവിധാനം സഹായകമാകും.
സഖി വണ് സ്റ്റോപ്പ് സെന്ററുകള് വഴി നിയമസഹായവും കൗണ്സലിങ്ങും ഉറപ്പാക്കാനും ടാസ്ക് ഫോഴ്സ് മുന്കൈയെടുക്കും. പുതിയ ടാസ്ക് ഫോഴ്സ് നിലവില് വരുന്നതോടെ ഇത്തരം കേസുകളില് പൊലീസിന്റെ ഭാഗത്തുനിന്നുള്ള ഇടപെടല് കൂടുതല് കാര്യക്ഷമമാകുമെന്നാണ് വിലയിരുത്തല്.
Discussion about this post