സംവിധായകനും നടനുമായ ബേസിൽ ജോസഫ് സിനിമാ നിർമാണത്തിലേക്ക്. ബേസിൽ തന്നെയാണ് സോഷ്യൽ മീഡിയ പേജിലൂടെ ഇക്കാര്യം പ്രഖ്യാപിച്ചത്. ‘ബേസിൽ ജോസഫ് എന്റർടെയ്ൻമെന്റ്’ എന്നാണ് പേര് നൽകിയിരിക്കുന്നത്. ബാനറിന്റെ ടെെറ്റിൽ ഗ്രാഫിക്സും പുറത്തുവിട്ടിട്ടുണ്ട്.
‘അപ്പോൾ, ഇതാ വീണ്ടും തുടങ്ങുന്നു, ഞാൻ ഇതുവരെ ചെയ്യാത്തൊരു കാര്യം ഒന്ന് പരീക്ഷിക്കുന്നു, സിനിമ നിർമ്മാണം. എങ്ങനെയെന്ന് ഇപ്പോഴും പഠിച്ചുവരുന്നതേയുള്ളൂ. എന്നാൽ കഥകൾ കൂടുതൽ നന്നായി, ധെെര്യപൂർവം, പുതിയ രീതിയിൽ പറയാൻ ഞാൻ ആഗ്രഹിക്കുന്നു. ഈ പുതിയ പാത നമ്മെ എവിടേക്ക് കൊണ്ടുപോകുമെന്ന് നോക്കാം. ബേസിൽ ജോസഫ് എന്റർടെയ്ൻമെന്റിലേക്ക് സ്വാഗതം’- ബേസിൽ കുറിച്ചു.
പിസ ഗോപുരം താഴെ നിന്ന് ഉയർത്തി നേരയാക്കാൻ നോക്കുന്ന സൂപ്പർഹീറോ വേഷത്തിലുള്ള ഒരു കുഞ്ഞിന്റെ ആനിമേഷനിലാണ് ടെെറ്രിൽ ഗ്രാഫിക്സ്. നേരെ നിർത്തിയ ഗോപുരം തള്ളി താഴെയിട്ട ശേഷം കൂളിംഗ് ഗ്ലാസ് ധരിച്ച് കെെയിൽ കോലുമിഠായിയുമായി നിൽക്കുന്ന കുട്ടിയുടെ കാരിക്കേച്ചർ ഉൾപ്പെടുന്നതാണ് ലോഗോ. ബേസിൽ സംവിധാനം ചെയ്ത ‘മിന്നൽമുരളി’ റഫറൻസ് ഉള്ളതാണ് ടെെറ്റിൽ ഗ്രാഫിക്സ്. പശ്ചാത്തല സംഗീതത്തിനൊപ്പം ബേസിലിന്റെ പൊട്ടിച്ചിരിയും കേൾക്കാം. നടൻ നിർമിക്കുന്ന ആദ്യ സിനിമ ഏതായിരിക്കുമെന്നതടക്കമുള്ള വിവരങ്ങൾ പുറത്തുവിട്ടിട്ടില്ല. സംവിധായകനായും നടനായും ബേസിൽ മലയാള സിനിമായിൽ സജീവമാണ്. ‘കുഞ്ഞിരാമായണ’, ‘ഗോദ’, ‘ മിന്നൽമുരളി’ എന്നീ ചിത്രങ്ങൾ ബേസിൽ സംവിധാനം ചെയ്തിട്ടുണ്ട്.
Discussion about this post