”ഇറാനുമായി ‘നല്ല ചർച്ച’ നടന്നു”; ഇടക്കാല തെരഞ്ഞെടുപ്പിന് ശേഷം കരാർ പ്രതീക്ഷിക്കുന്നതായി ട്രംപ്

ന്യൂയോർക്ക്: ഇറാൻ പ്രതിനിധി സംഘവുമായി യുഎസ് ഉദ്യോഗസ്ഥർ മൂന്ന് മണിക്കൂർ നീണ്ട കൂടിക്കാഴ്ച നടത്തിയെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. വൈറ്റ് ഹൗസ് ഉപദേശകൻ ജാറെദ് കുഷ്നർ, പശ്ചിമേഷ്യൻ ദൂതൻ സ്റ്റീവ് വിറ്റ്കോഫ് എന്നിവരും ഇറാൻ സംഘവുമായുള്ള നിർണായക ചർച്ചകളിൽ പങ്കെടുത്തു.

ചർച്ചകൾ പോസിറ്റിവ് ആയിരുന്നുവെങ്കിലും ഒരു ധാരണയിലെത്തുന്നതിന് ഇപ്പോഴും ചില തടസങ്ങൾ നിലനിൽക്കുന്നുണ്ടെന്ന് ട്രംപ് വ്യക്തമാക്കി. അമേരിക്കൻ അധികൃതരുമായി ചർച്ച നടന്നതായി ഔദ്യോഗിക പ്രതിനിധികളെ ഉദ്ധരിച്ച് ഇറാൻ ടിവിയും സ്ഥിരീകരിച്ചിട്ടുണ്ട്.

ഇതിനിടെ, ഗൾഫ് രാജ്യങ്ങളിലെ പ്രമുഖ നേതാക്കളുമായി ട്രംപ് പ്രത്യേകം ചർച്ചകൾ നടത്തി. അമേരിക്കൻ ഇടക്കാല തെരഞ്ഞെടുപ്പിന് ശേഷം ഇറാനുമായി കരാറിലെത്താൻ കഴിയുമെന്നാണ് പ്രതീക്ഷിക്കുന്നതെന്ന് അദ്ദേഹം കൂട്ടിച്ചേർത്തു. ഒപ്പം, ഇറാനെ സാമ്പത്തികമായി പൂർണമായും ഒറ്റപ്പെടുത്തണമെന്ന് ലോകരാജ്യങ്ങളോട് ട്രംപ് ആഹ്വാനം ചെയ്തു. അതിനിടെ, ഹോർമുസ് കടലിടുക്കിൽ അജ്ഞാത പ്രോജക്റ്റൈലിന്റെ അവശിഷ്ടങ്ങൾ തട്ടി മറ്റൊരു കപ്പലിന് കൂടി കേടുപാടുകൾ സംഭവിച്ചതായി യു.കെ.എം.ടി.ഒ (UKMTO) റിപ്പോർട്ട് ചെയ്തു.