കൊയിലാണ്ടി: കെ റെയിലിനെതിരെ ബി.ജെ.പി ജില്ലാ പ്രസിഡന്റ് വി.കെ.സജീവന്‍ നയിച്ച പദയാത്രയിയില്‍ പൊന്നാടയണിഞ്ഞ് സ്വീകരണം ഏറ്റുവാങ്ങിയതില്‍ പ്രവര്‍ത്തകരോട് മാപ്പ് ചോദിച്ച് കെ റെയിൽ സമരസമിതി നേതാവ് ടി.ടി.ഇസ്മയില്‍. ലീഗ് നേതാവ് കൂടിയായ അദ്ദേഹം ബി ജെ പി യുമായി വേദി പങ്കിട്ടത് മുസ്‌ലിം ലീഗ് അണികളിൽ കടുത്ത അമർഷം ഉണ്ടായിട്ടുണ്ട് എന്ന് മനസ്സിലാക്കിയത് ശേഷമാണ് അദ്ദേഹം ഖേദപ്രകടനം നടത്തിയത്. വിവാദങ്ങളുണ്ടായതുകൊണ്ട് സൂക്ഷ്മത അനിവാര്യമാണെന്ന് ബോധ്യപ്പെട്ടെന്നും അദ്ദേഹം പറഞ്ഞു.
സമരമുന്നണിക്ക് രാഷ്ട്രീയമില്ല. സമരമുന്നണിയുടെ രാഷ്ട്രീയം അതിജീവനത്തിന്റെ രാഷ്ട്രീയമാണ്. സമരം വിജയിക്കുന്നതുവരെ സമരമുന്നണിയിലുള്ളവരെ സമരത്തിന്റെ കൂടെ നിര്‍ത്തുകയെന്നത് സമരപ്രവര്‍ത്തകരുടെ ബാധ്യതയാണ്. ആ ബാധ്യത നിര്‍വഹിക്കുകയെന്നത് ഇതില്‍ ഇടപെടുന്ന ഒരു സമരപ്രവര്‍ത്തകന്‍ എന്ന നിലക്ക് തന്റെ ഉത്തരവാദിത്തമാണ് എന്നും ആ ഉദ്ദേശ്യത്തിലാണ് ബി.ജെ.പി ജില്ലാ പ്രസിഡന്റ് നയിക്കുന്ന സമരപന്തലിനടുത്ത് പോയതെന്നും ടി.ടി.ഇസ്മയില്‍ പറഞ്ഞു.
‘മുസ്‌ലിം ലീഗ് പ്രവര്‍ത്തകന്‍ എന്ന നിലയില്‍ പറഞ്ഞാല്‍ കൃത്യമായും രണ്ട് ധ്രുവങ്ങളില്‍ നില്‍ക്കുന്ന പാര്‍ട്ടികളാണ് ബി.ജെ.പിയും മുസ്‌ലിം ലീഗും. ഏറ്റവും ആത്മാര്‍ത്ഥതയുള്ള പ്രവര്‍ത്തകരാണ് മുസ്‌ലിം ലീഗിന്റേത്. സ്വാഭാവികമായിട്ടും ഈ വിഷയത്തില്‍ അവര്‍ക്ക് വേദനയുണ്ട് എന്നുള്ളത് എനിക്ക് കൃത്യമായിട്ട് അറിയാം. യഥാര്‍ത്ഥത്തില്‍ സൂക്ഷ്മത വേണ്ടതായിരുന്നില്ലേയെന്ന് ചോദ്യങ്ങളുയരാം. അതില്‍ എനിക്ക് സന്ദേഹവുമില്ല. പ്രയാസമുണ്ടായ മുസ്‌ലിം ലീഗ് പ്രവര്‍ത്തകരോട് കൃത്യമായി ഖേദപ്രകടനം നടത്തിയിട്ടുണ്ട്.’ എന്നും അദ്ദേഹം പറഞ്ഞു.
കാട്ടിലപ്പീടിയില്‍വെച്ചായിരുന്നു ടി.ടി.ഇസ്മയില്‍ ബി.ജെ.പി സ്വീകരണം ഏറ്റുവാങ്ങിയത്. വേദിയിലെത്തിയ ഇസ്മയിലിനെ പൊന്നാടയണിയിച്ച് ബി.ജെ.പി പ്രവര്‍ത്തകര്‍ സ്വീകരിച്ചിരുന്നു.
Discussion about this post