തിക്കോടി: വിമത പ്രവർത്തനം ശക്തമായ തിക്കോടി ബി ജെ പിയിൽ നടപടികൾക്ക് വേഗത കൂട്ടി നേതൃത്വം. പയ്യോളി മണ്ഡലം വൈസ് പ്രസിഡൻ്റ് വിശ്വനാഥൻ പിലാച്ചേരി, പിരിച്ചുവിടപ്പെട്ട തിക്കോടി ബി ജെ പി പഞ്ചായത്ത് കമ്മിറ്റി പ്രസിഡൻ്റായിരുന്ന നടുക്കണ്ടി ശിവ പ്രകാശൻ എന്നിവരെ പാർട്ടിയിൽ നിന്നും സസ്പെൻ്റ് ചെയ്തു. സംഘടനാ വിരുദ്ധ പ്രവർത്തനം നടത്തിയതിൻ്റെ പേരിലാണ് ജില്ലാ അധ്യക്ഷൻ വി കെ സജീവൻ ഇവരെ പാർട്ടിയിൽ നിന്നും സസ്പെൻ്റ് ചെയ്തു കൊണ്ട് കത്തയച്ചത്.
ഇതോടെ, വിമത പ്രവർത്തനം നടത്തുന്നവർക്ക് പാർട്ടിയിൽ സ്ഥാനമുണ്ടാവില്ലെന്ന കൃത്യമായ സന്ദേശം നൽകുകയാണ് പുറത്താക്കൽ നടപടിയിലൂടെ നേതൃത്വം ചെയ്തിരിക്കുന്നത്.
സംസ്ഥാന കമ്മിറ്റി ആഹ്വാനം ചെയ്ത ധനസമാഹരണമുൾപ്പെടെയുള്ള പാർട്ടിയുടെ പരിപാടികളിൽ ബോധപൂർവം ഗുരുതരമായ വീഴ്ച വരുത്തുകയും കീഴ് വഴക്കങ്ങളും അച്ചടക്കവും ലംഘിച്ചതായും കണ്ടെത്തിയതിനെ തുടർന്ന് നേരത്തേ തിക്കോടി പഞ്ചായത്ത് കമ്മിറ്റി പിരിച്ചുവിടുകയും പകരം ചുമതല നൽകുകയും ചെയ്തിരുന്നു.
നടുക്കണ്ടി ശിവ പ്രകാശ് പ്രസിഡൻ്റും
ചെറുകുന്നുമ്മൽ ബാബു സെക്രട്ടറിയുമായ പഞ്ചായത്ത് കമ്മിറ്റിയെ ആണ് ജില്ലാ നേതൃത്വം പിരിച്ചുവിട്ടത്.
തുടർന്നും, പാർട്ടിക്കും നേതൃത്വത്തിനുമെതിരെ പ്രവർത്തിച്ചുവെന്ന് നേതൃത്വത്തിന് ബോധ്യപ്പെട്ടതിൻ്റെ അടിസ്ഥാനത്തിലാണ് സസ്പെൻഷൻ നടപടി.
Discussion about this post