തിരുവനന്തപുരം: ഉന്നത വിദ്യാഭ്യാസ രംഗത്ത് വലിയ മാറ്റം ലക്ഷ്യമിടുന്നുവെന്നും ഇതിനായി ബജറ്റില് വലിയ പരിഗണനയാണ് വിദ്യാഭ്യാസ മേഖലയ്ക്ക് നല്കിയിട്ടുള്ളതെന്നും ധനമന്ത്രി കെ എന് ബാലഗോപാല് വ്യക്തമാക്കി. സര്വകലാശാലകളുടെ പ്രവര്ത്തനം മെച്ചപ്പെടുത്തുന്നതിന് 200 കോടി രൂപ വകയിരുത്തി. ഹ്രസ്വകാല കോഴ്സുകള്ക്ക് 20 കോടി രൂപ നീക്കിവെയ്ക്കുമെന്നും ബജറ്റ് അവതരണ വേളയില് ധനമന്ത്രി കെ എന് ബാലഗോപാല് അറിയിച്ചു.
സര്വകലാശാലകളോട് ചേര്ന്ന് 1500 ഹോസ്റ്റല് മുറികള് സ്ഥാപിക്കും. രാജ്യാന്തര നിലവാരത്തിലുള്ള 250 ഹോസ്റ്റല് മുറികള് കൂടി സ്ഥാപിക്കുമെന്നും കെ എന് ബാലഗോപാല് വ്യക്തമാക്കി. തൊഴില് മേഖലയുടെ വളര്ച്ചയ്ക്ക് പ്രത്യേക ഊന്നല് നല്കും.ജില്ലാ സ്കില് പാര്ക്കുകള്ക്ക് 350 കോടി രൂപ നീക്കിവെച്ചു. 14 ജില്ലകളിലും തൊഴില് സംരഭക സെന്ററുകള് ആരംഭിക്കുമെന്നും ധനമന്ത്രി വ്യക്തമാക്കി.
കൊല്ലത്തും കണ്ണൂരിലും പുതിയ ഐടി പാര്ക്കുകള് സ്ഥാപിക്കുമെന്ന് ധനമന്ത്രി കെ എന് ബാലഗോപാല്. ഇതിനായി സ്ഥലമേറ്റെടുക്കാന് 1000 കോടി അനുവദിച്ചുവെന്നും ബാലഗോപാല് പറഞ്ഞു.
സംസ്ഥാനത്ത് 4 സയന്സ് പാര്ക്കുകള് സ്ഥാപിക്കാന് ബജറ്റില് പ്രഖ്യാപനമായി. 1000 കോടി ചിലവഴിച്ച് 3 വര്ഷം കൊണ്ട് പൂര്ത്തിയാക്കാനാണ് നീക്കം. ഐടി ഇടനാഴി വിപുലീകരിക്കും. എന്എച്ച് 66ന് സമാന്തരമായി നാലു ഐടി ഇടനാഴികള് സ്ഥാപിക്കുമെന്നും കെ എന് ബാലഗോപാല് അറിയിച്ചു.
Discussion about this post