റിസര്വ് ബാങ്ക് ഒഫ് ഇന്ത്യ; തങ്ങളുടെ വിവിധ ശാഖകളിലായി 950 അസിസ്റ്റന്റ് തസ്തികകളിലേക്കുള്ള അപേക്ഷ ക്ഷണിച്ചു. ഉദ്യോഗാർഥികൾക്ക് ആര്ബിഐയുടെ ഔദ്യോഗിക വെബ്സൈറ്റായ www.rbi.org.in വഴി ഓണ്ലൈനായി അപേക്ഷിക്കാം. അഹമ്മദാബാദ്, ബെംഗളൂരു, ഭോപ്പാൽ, ചണ്ഡീഗഡ്, ന്യൂഡല്ഹി, പട്ന, ജയ്പൂര്, ഹൈദരാബാദ് എന്നിവയുൾപ്പെടെ വിവിധ നഗരങ്ങളില് സ്ഥിതി ചെയ്യുന്ന ബാങ്കിന്റെ വിവിധ ഓഫീസുകളിലെ ഒഴിവുകളിലേക്ക് ഉദ്യോഗാർഥികൾക്ക് അപേക്ഷിക്കാം. അപേക്ഷകൾ സമര്പ്പിക്കേണ്ട അവസാന തീയതി മാര്ച്ച് 8 ആണ്.
ആര്ബിഐ അസിസ്റ്റന്റ് റിക്രൂട്ട്മെന്റ് 2022: യോഗ്യതാ മാനദണ്ഡം
ഉദ്യോഗാർഥികൾ 20 നും 28 നും ഇടയില് പ്രായമുള്ളവരായിരിക്കണം. ഏതെങ്കിലും വിഷയത്തില് 50 ശതമാനത്തില് കുറയാതെയുള്ള ബിരുദം ഉണ്ടായിരിക്കണം. കൂടാതെ, കംപ്യൂട്ടര് പരിജ്ഞാനവും ഇംഗ്ലീഷ് ഭാഷയില് പ്രാവീണ്യവും ആവശ്യമാണ്.
അപേക്ഷിക്കേണ്ട വിധം:
STEP_ 1: ആര്ബിഐയുടെ ഔദ്യോഗിക വെബ്സൈറ്റ്
( www.rbi.org.in) സന്ദര്ശിച്ച് ‘നിലവിലെ ഒഴിവുകൾ എന്ന പേജ് തുറക്കുക.
STEP_ 2: ഇപ്പോൾ ലഭ്യമായ ടാബിലെ ഓപ്ഷനുകളില് നിന്ന് ‘ഒഴിവുകൾ തിരഞ്ഞെടുക്കുക.
STEP_ 3: അടുത്തതായി, ഒഴിവുകളുടെ ലിസ്റ്റില് നിന്ന് ‘അസിസ്റ്റന്റ് തസ്തികയ്ക്കുള്ള റിക്രൂട്ട്മെന്റ്’ കണ്ടെത്തി അതില് ക്ലിക്ക് ചെയ്യുക.
STEP_ 4: തുടര്ന്ന് ‘പുതിയ രജിസ്ട്രേഷന് എന്നതില് ക്ലിക്ക് ചെയ്ത് അടിസ്ഥാന വിശദാംശങ്ങൾ പൂരിപ്പിച്ച് സ്വയം രജിസ്റ്റര് ചെയ്യുക.
STEP_ 5: വിശദാംശങ്ങൾ നല്കി ആവശ്യമായ രേഖകൾ അപ്ലോഡ് ചെയ്തുകൊണ്ട് അപേക്ഷാ ഫോം പൂരിപ്പിക്കുക.
STEP_ 6: ഭാവിയിലെ ഉപയോഗത്തിനായി അപേക്ഷാ ഫോം സേവ് ചെയ്ത് സൂക്ഷിക്കുക.
STEP_ 7: അവസാനമായി അപേക്ഷാ ഫീസ് അടയ്ക്കുക.
ആര്ബിഐ അസിസ്റ്റന്റ് റിക്രൂട്ട്മെന്റ് 2022: അപേക്ഷാ ഫീസ്
ഒബിസി, ജനറല് വിഭാഗക്കാര്ക്ക് 450 രൂപയും എസ്സി, എസ്ടി, പിഡബ്ല്യുഡി, ഇഡബ്ല്യുഎസ് വിഭാഗക്കാര്ക്ക് 50 രൂപയുമാണ് ഫീസ്.
തിരഞ്ഞെടുപ്പ്:
പ്രിലിമിനറി പരീക്ഷ, മെയിന്സ് പരീക്ഷ, ലാംഗ്വേജ് പ്രൊഫിഷ്യന്സി ടെസ്റ്റ് (എല്പിടി) എന്നിങ്ങനെ മൂന്ന് ഘട്ടങ്ങളിലായി നടത്തുന്ന പരീക്ഷയുടെ അടിസ്ഥാനത്തിലാണ് ഉദ്യോഗാർഥികളെ തിരഞ്ഞെടുക്കുന്നത്. പ്രിലിമിനറി പരീക്ഷയില് മൂന്ന് വിഭാഗങ്ങളുണ്ടാകും – റീസണിങ് എബിലിറ്റി, ന്യൂമറിക്കൽ എബിലിറ്റി, ഇംഗ്ലീഷ് ഭാഷ എന്നിവയായിരിക്കും അത്.
അതേസമയം, മെയിന്സ് പരീക്ഷ അഞ്ച് വിഭാഗങ്ങൾ ഉൾക്കൊള്ളുന്നതാണ് – റീസണിങ്, ക്വാണ്ടിറ്റേറ്റീവ് അഭിരുചി, ഇംഗ്ലീഷ് ഭാഷ, കംപ്യൂട്ടര് പരിജ്ഞാനം, പൊതു അവബോധം എന്നിവയായിരിക്കും ഉള്ളത്.
മെയിന്സ് പരീക്ഷയ്ക്ക് ശേഷം ഷോര്ട്ട്ലിസ്റ്റ് ചെയ്ത ഉദ്യോഗാർഥികൾക്കായി പിന്നീട് ലാംഗ്വേജ് പ്രൊഫിഷ്യന്സി ടെസ്റ്റ് (എല്പിടി) നടത്തും. അന്തിമ തിരഞ്ഞെടുപ്പിനായി പരിഗണിക്കുന്നതിന് സ്ഥാനാർഥികൾ മൂന്ന് റൗണ്ടുകളും വിജയിക്കണം. പ്രിലിമിനറി പരീക്ഷ മാര്ച്ച് 26, 27 തീയതികളിലാണ് നടത്തുക.
ശമ്പളം: വിജയകരമായി തിരഞ്ഞെടുക്കപ്പെടുന്ന ഉദ്യോഗാർഥികൾക്ക് പ്രതിമാസം 36,091 രൂപ വരെ ശമ്പളം ലഭിക്കും.
Discussion about this post