ആർ ഡി ഒ യുടെ ഉറപ്പിന് പുല്ലുവില; നന്തി ശ്രീശൈലം കുന്ന് വഗാഡ് ലേബർ ക്യാംപിൽ എല്ലാം പതിവ് പോലെ

നന്തി: യോഗ തീരുമാനങ്ങൾ നടപ്പാക്കാത്തതിനെ തുടർന്ന് ഇന്നും ലേബർ ക്യാംപ് ഉപരോധിക്കുന്നു. ഇന്നലെ നന്തി ശ്രീശൈലംകുന്ന് ലേബർ ക്യാംപിൽ നടന്ന ഉപരോധസമരത്തെ തുടർന്ന് ആർ ഡി ഒ യുടെ നേതൃത്വത്തിൽ ജനപ്രതിനിധികളുടെയും കമ്പനി അധികൃതർ, സമരസമിതി നേതാക്കൾ എന്നിവരുടെ സാന്നിധ്യത്തിൽ ചർച്ചയിൽ എടുത്ത തീരുമാനങ്ങൾക്ക് പുല്ലുവില. അടിയന്തര പ്രാധാന്യമുള്ള രണ്ട് തീരുമാനങ്ങൾ നടപ്പിലാക്കാതെ ജില്ലാ ഭരണകൂടത്തെയും ജനങ്ങളെയും വെല്ലുവിളിക്കുകയാണ് വഗാഡ് ഇൻഫ്രാ പ്രൊജക്ട് കമ്പനി. ഇതോടെ ശക്തമായ ഉപരോധവുമായി ഇന്നും സമരസമിതി ലേബർ ക്യാംപിൽ സമരമാരംഭിച്ചു.

ഇതിനിടെ സമരം താത്കാലികമായി നിർത്തിവെക്കണമെന്നാവശ്യപ്പെട്ട് ഇന്ന് രാവിലെ മൂടാടി ഗ്രാമപഞ്ചായത്ത് വൈസ് പ്രസിഡണ്ട് ഷീജ പട്ടേരിയുടെ നേതൃത്വത്തിൽ സമരക്കാരുമായി സംസാരിച്ചിരുന്നുവെങ്കിലും ഉപരോധം നിർത്തിവെക്കാൻ സമരക്കാർ തയ്യാറായില്ല. തീരുമാനങ്ങൾ നടപ്പാക്കുന്നതിന് നാലുദിവസം കൂടി വഗാഡ് കമ്പനിക്ക് സാവകാശം നൽകണമെന്നും സമരം പിൻവലിക്കാനുമായിരുന്നു ആവശ്യം. ജില്ലാ കളക്ടർ നിർദ്ദേശമനുസരിച്ച് ഗ്രാമപഞ്ചായത്ത് പ്രസിഡണ്ട് ആണ് സമരക്കാരുമായി സംസാരിക്കാൻ ഇവരെ നിയോഗിച്ചത്. സമരം നിർത്താൻ തയ്യാറല്ലെന്നും ലേബർ ക്യാപിലുള്ളവർ ഒഴിഞ്ഞുപോകും വരെ സമരം തുടരുമെന്നും സമരക്കാർ അറിയിച്ചു. ഇതേതുടർന്ന് വൻ പോലീസ് സന്നാഹത്തെ സ്ഥലത്ത് ഒരുക്കിയിട്ടുണ്ട്.

ശ്രീശൈലംകുന്നിലെ വഗാഡ് ലേബർ ക്യാംപ് നിർത്തിവെക്കണമെന്നും മലിനമായ ജലത്തിന് പകരം അടിയന്തരമായി കുടിവെള്ളം എത്തിക്കണമെന്നാവശ്യപ്പെട്ടും സി പി ഐ എം നേതൃത്വത്തിൽ ലേബർ ക്യാംപിന് മുന്നിൽ ഇന്നലെ നടന്ന ഉപരോധസമരം ആർ ഡി ഒ നേരിട്ടെത്തി സമരക്കാരുമായി സംസാരിച്ചതിനെ തുടർന്ന് അവസാനിപ്പിച്ചിരുന്നു. സമരത്തെ തുടർന്ന് മൂടാടി ഗ്രാമപഞ്ചായത്ത് ഓഫീസിൽ നടന്ന ചർച്ചയിലെടുത്ത സുപ്രധാന തീരുമാനങ്ങൾ ആർ ഡി ഒ ബിജു  നേരിട്ടെത്തി സമരക്കാരെ അറിയിച്ചതിനെ തുടർന്നാണ് മണിക്കൂറുകൾ നീണ്ട ഉപരോധസമരം അവസാനിപ്പിച്ചത്.

ആർ ഡി ഒ സമരക്കാരെ അറിയിച്ച തീരുമാനങ്ങൾ ഇതായിരുന്നു.

1_ കിണറുകൾ മലിനമായ 19 കുടുംബങ്ങൾക്കും കുടിവെള്ളം സംഭരിക്കാനാവശ്യമായ 1000 ലിറ്റർ ശേഷിയുള്ള ടാങ്ക് വിതരണം ചെയ്യും. ഇതിലേക്കാവശ്യമായ കുടിവെള്ളം എത്തിക്കുന്നതിന് ഗ്രാമപഞ്ചായത്ത് വൈസ് പ്രസിഡണ്ടിൻ്റെ നേതൃത്വത്തിൽ പ്രത്യേക കമ്മിറ്റി രൂപീകരിച്ചു.

2_ മലിനീകരണ നിയന്ത്രണ സംവിധാനങ്ങൾ സ്ഥാപിക്കണമെന്ന, വഗാഡ് ഇൻഫ്രാ പ്രോജക്ടിന് നേരത്തേ നൽകിയ നിർദ്ദേശമനുസരിച്ച്, പ്രസ്തുത സംവിധാനങ്ങളുടെ കാര്യക്ഷമതയും ശാസ്ത്രീയതയും വിദഗ്ദർ പരിശോധിക്കും. അതുവരെ സെക്യൂരിറ്റി ജീവനക്കാർ ഒഴിച്ച് മറ്റാരും ഇവിടെ താമസിക്കാൻ പാടുള്ളതല്ല.

3_  പ്രദേശത്തെ ജനങ്ങളുടെ ജീവനും സ്വത്തിനും ഭീഷണിയാകുന്ന രീതിയിൽ ഇളക്കി കൂട്ടിയിട്ട മണ്ണ് ബലപ്പെടുത്തുന്നതിനോ മറ്റ് സുരക്ഷാ സംവിധാനങ്ങൾ തേടുന്നതിനോ, ജില്ലാ ജിയോളജിസ്റ്റ്, ജില്ലാ സോയിൽ കൺസർവേഷൻ ഓഫീസർ, പഞ്ചായത്ത് എഞ്ചിനീയർ എന്നിവർ പരിശോധിച്ച് എന്തു നടപടി സ്വീകരിക്കണമെന്ന് ആലോചിക്കും.

ഇതിൽ ആദ്യത്തെ രണ്ടു തീരുമാനങ്ങളും മഷിയുണങ്ങും മുമ്പേ ലംഘിക്കപ്പെട്ടു. ഇതാണ് സമരസമിതിയെ വീണ്ടും സമരത്തിന് പ്രേരിപ്പിച്ചത്. അതേസമയം, തങ്ങൾ വികസനത്തിനോ പ്ലാന്റിനോ എതിരല്ലെന്നും പ്രദേശത്തെ മാലിന്യവൽക്കരിക്കുന്ന ലേബർ ക്യാംപിനെയാണ്‌ എതിർക്കുന്നതെന്നും സമരസമിതി പറയുന്നു.