കൊയിലാണ്ടി: കുട്ടികളുടെ സമഗ്രമായ വികസനം ലക്ഷ്യമാക്കി പൂക്കാട് കലാലയം ചില്ഡ്രന്സ് തിയ്യറ്ററിന്റെ ആഭിമുഖ്യത്തില് നടത്തിവരുന്ന അനൗപചാരിക വിദ്യാഭ്യാസപരിപാടിയായ കളിആട്ടം, മെയ് നാലിന് വൈകു. 5 മണിക്ക് കോഴിക്കോട് മേയര് ബീനാഫിലിപ്പ് ഉദ്ഘാടനം ചെയ്യുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. ക്യാംപ് രാവിലെ 9 മണിക്ക് ആരംഭിക്കും. അഞ്ചുദിവസം നിണ്ടുനില്ക്കുന്ന തിയേറ്റര് ഫെസ്റ്റിവെൽ ജില്ലാപഞ്ചായത്ത് പ്രസിഡണ്ട് ഷീജാശശി ഉദ്ഘാടനം ചെയ്യും.
ദിവസേന, കാലത്ത് 7 മണിക്ക് ആരംഭിക്കുന്ന പരിശീലന പരിപാടികള് വൈകീട്ട് നടക്കുന്ന തിയേറ്റര് ഫെസ്റ്റിവലോടെ സമാപിക്കും. തിയേറ്റര് ഫെസ്റ്റിവലില് തൃശ്ശൂര് തിയ്യറ്റര് റിപ്പബ്ലിക്ക് അവതരിപ്പിക്കുന്ന എലിക്കെണി നാടകം, പ്രഭാകരന് പുന്നശ്ശേരിയും സംഘവും അവതരിപ്പിക്കുന്ന ഓട്ടന് തുള്ളല്, ചേലിയ കഥകളി വിദ്യാലയം അവതരിപ്പിക്കുന്ന കഥകളി, കുമാരി നന്ദിനി ശിവദാസ് അവതരിപ്പിക്കുന്ന തായമ്പക, ഗുരുചേമഞ്ചേരി കുഞ്ഞിരാമന് നായരുടെ കലാജീവിതവഴികളിലെ അനശ്വരമുഹൂര്ത്തങ്ങള് കേര്ത്തിണക്കി കലാലയം നൃത്തവിഭാഗം അവതരിപ്പിക്കുന്ന ഗുരുപഥം നൃത്തസംഗീതിക, കലാലയം ചില്ഡ്രന്സ് തിയറ്റര് അവതരിപ്പിക്കുന്ന നാടകം മാര്ഗയി, കാവ്യനാടകം കാവ്യകൈരളി എന്നിവ അവതരിപ്പിക്കും. നിത്യേനെ വൈകീട്ട് 6.30ന് കുട്ടികള്ക്കായി ഷോര്ട്ട് ഫിലിംമേള നടക്കും. കളിആട്ടം ക്യാംപിൽ കേരളത്തിലെ പ്രഗത്ഭരും പ്രശസ്തരുമായ വ്യക്തികള് കുട്ടികളുമായി സംവദിക്കും. രക്ഷിതാക്കള്ക്കായി ഡോ. കെ പി അരവിന്ദന്റെ ആരോഗ്യബോധവല്ക്കരണ ക്ലാസ്സ് നടക്കും.
മെയ് 7 ശനിയാഴ്ച ക്യാംപ് അംഗങ്ങൾ സംഘങ്ങളായി തിരിഞ്ഞ് ഗ്രാമത്തിന്റെ വിവിധ പ്രദേശങ്ങളില് സൗഹൃദക്കൂട്ടായ്മകളൊരുക്കുന്ന നാട്ടുകളിപ്പന്തലില് ഒത്തുചേര്ന്ന് പരിപാടികളവതരിപ്പിക്കും. മെയ് 8 ന് ചേമഞ്ചേരി ക്വിറ്റ് ഇന്ത്യാസമര സ്മാരകത്തില് നിന്ന് ആരംഭിച്ച് കാപ്പാട് കടപ്പുറത്തേക്ക് ക്യാംപ് അംഗങ്ങളും കലാലയം പ്രവര്ത്തകരും സ്വാതന്ത്ര്യസമരസ്മരണകളുണര്ത്തിക്കൊണ്ട് ചരിത്രവഴികളിലൂടെ നാടകയാത്ര നടത്തും. ചരിത്രപ്രസിദ്ധമായ ഉപ്പുകുറുക്കല് സമരത്തിന്റെ നാടകചിത്രം ആവിഷ്ക്കരിക്കും. സമാപനദിവസമായ മെയ് 9 ന് ക്യാംപിലൂടെ കുട്ടികള് തയ്യാറാക്കുന്ന 10 നാടകങ്ങള് അവതരിപ്പിക്കും. വൈകീട്ട് 4 മണിക്ക് നടക്കുന്ന സമാപന സമ്മേളനം എം എല് എ കാനത്തില് ജമീല ഉദ്ഘാടനം ചെയ്യും. പ്രശസ്ത നാടകസംവിധായകന് മനോജ് നാരായണനാണ് ക്യാംപ് ഡയരക്ടര്. എ അബൂബക്കര് ക്യാംപ് കോ-ഓര്ഡിനേറ്ററാണ്. കളിആട്ടത്തിന്റെ പ്രവര്ത്തനങ്ങള് ഏകോപിപ്പിക്കുന്നത് ബാബു പറശ്ശേരി ചെയര്മാനും കെ ശ്രീനിവാസന് ജനറല് കണ്വീനറുമായ സ്വാഗത സംഘം കമ്മിറ്റിയാണ്.
കുട്ടികളുടെ അവധിക്കാല കൂട്ടായ്മയില് 400 ഓളം കുട്ടികള് പങ്കെടുക്കും. നാടകപഠനത്തോടൊപ്പം ഭാഷ, ചരിത്രം, ചിത്രരചന, സംഗീതം, താളം, വ്യായാമം, തിയ്യറ്റര് തുടങ്ങിയവയില് ചിട്ടയായ പരിശീലനം നടക്കും. 1999 ല് നാടകാചാര്യന് പ്രൊഫസര് എസ് രാമാനുജം, കൊച്ചുനാരായണപ്പിള്ള എന്നിവരുടെ നേതൃത്വത്തില് കുട്ടികളുടെ നാടകപരിശീലനകേമ്പോടെ ആരംഭിച്ച പൂക്കാട് കലാലയം ചില്ഡ്രന്സ് തിയ്യറ്ററിൻ്റെ ഒമ്പതാമത് കളി ആട്ടമാണ് ഒരുങ്ങുന്നതെന്ന് സ്വാഗത സംഘം ഭാരവാഹികൾ പറഞ്ഞു.
വാർത്താ സമ്മേളനത്തിൽ സി വി ബാലകൃഷ്ണന്, സുനില് തിരുവങ്ങൂര്, ശിവദാസ് കാരോളി, വിജയരാഘവന് ചേലിയ, കെ രാധാകൃഷ്ണൻ പങ്കെടുത്തു.
Discussion about this post