ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ഭക്ഷ്യ സുരക്ഷാ പദ്ധതി ‘പ്രധാൻമന്ത്രി ഗരീബ് കല്യാൺ അന്ന യോജന (പി എം ജി കെ എ വൈ)’, കൊവിഡ് കാലത്ത് രാജ്യത്തെ കടുത്ത ദാരിദ്ര്യത്തിന്റെ തോത് വർദ്ധിക്കുന്നത് തടയാൻ സഹായിച്ചുവെന്ന് ഇന്റർനാഷണൽ മോണിറ്ററി ഫണ്ടിന്റെ (ഐ എം എഫ്) പഠന റിപ്പോർട്ടിൽ പറയുന്നു.
2019 ൽ ഇന്ത്യയിൽ കടുത്ത ദാരിദ്ര്യം ഒരു ശതമാനത്തിൽ താഴെയായിരുന്നു. 2020 ലെ കൊവിഡ് കാലത്തും ആ നിരക്ക് വർദ്ധിക്കാതെ ഒരു ശതമാനത്തിൽ തന്നെ പിടിച്ചു നിർത്താൻ ഈ പദ്ധതിക്ക്ക് കഴിഞ്ഞു എന്നുമാണ് ഐ എം എഫിന്റെ ‘പാൻഡമിക്, പോവർട്ടി ആൻഡ് ഇനിക്വാളിറ്റി: എവിഡൻസ് ഫ്രം ഇന്ത്യ’ എന്ന പഠന റിപ്പോർട്ടിൽ പറയുന്നത്. ഇന്ത്യയിലെ കടുത്ത ദാരിദ്ര്യത്തിന്റെ അളവ് പിടിച്ചു നിറുത്തുന്നതിൽ പി എം ജി കെ എ വൈ പദ്ധതി നിർണായകമായിരുന്നു.
2020 മാർച്ച് 26 നാണ് പി എം ജി കെ എ വൈ പദ്ധതി രാജ്യത്ത് പ്രഖ്യാപിച്ചത്. ഇത് 2022 സെപ്തംബർ വരെ നീട്ടിയതായി കഴിഞ്ഞ മാസം പ്രധാനമന്ത്രി പ്രഖ്യാപിച്ചിരുന്നു. ഈ പദ്ധതിയുടെ കീഴിൽ മാസം അഞ്ച് കിലോ അരി അല്ലെങ്കിൽ ഗോതമ്പും ഒരു കിലോ പയറുമാണ് മുൻഗണനാ വിഭാഗത്തിലുള്ള ഓരോ കുടുംബത്തിനും റേഷൻ കടകൾ വഴി ലഭിക്കുന്നത്. ലോകത്തിലെ തന്നെ ഏറ്റവും വലിയ ഭക്ഷ്യ സുരക്ഷാ പദ്ധതിയാണിത്.
Discussion about this post