പയ്യോളി: നഗരസഭ കുടുംബശ്രീക്ക് പുതിയ സാരഥി. നേരത്തേ തിരഞ്ഞെടുക്കപ്പെട്ട എൻ കെ റീത്ത അയോഗ്യയാക്കപ്പെട്ടതിനെ തുടർന്നാണ് പയ്യോളിയിൽ വീണ്ടും തിരഞ്ഞെടുപ്പ് നടത്തേണ്ടി വന്നത്. 34 -ാം ഡിവിഷനിലെ സി ഡി എസ് അംഗം പി പി രമ്യയാണ് പുതിയ ചെയർപേഴ്സൺ. ബി പി എൽ വാർഡ് ആയി സംവരണം ചെയ്യപ്പെട്ട 15-ാം ഡിവിഷനെ പ്രതിനിധീകരിച്ച് പ്രീത ചോളം കയ്യിൽ സി ഡി എസ് അംഗമായി തിരഞ്ഞെടുക്കപ്പെട്ടു. ഇന്ന് (ബുധൻ) 3.30 ന് നടന്ന കുടുംബശ്രീയുടെ യോഗത്തിലാണ് ഐകകണ്ഠേന രമ്യ തിരഞ്ഞെടുക്കപ്പെട്ടത്. വരണാധികാരി സുരേഷ് തിരഞ്ഞെടുപ്പ് യോഗം നിയന്ത്രിച്ചു.
നേരത്തേ ഏറെ വിവാദമായിരുന്നു പയ്യോളി നഗരസഭയിലെ കുടുംബശ്രീ ചെയർപേഴ്സൺ തിരഞ്ഞെടുപ്പ്. തിരഞ്ഞെടുക്കപ്പെട്ടയാൾ ഹാജരാക്കിയ രേഖകളിൽ കൃത്രിമമുണ്ടെന്നാരോപിച്ച് ജില്ലാ വരണാധികാരിക്ക് രണ്ട് സി ഡി എസ് അംഗങ്ങൾ തന്നെ പരാതി നൽകുകയായിരുന്നു. ഇതേ തുടർന്ന് ഹാജരാക്കിയ രേഖകളിൽ പരിശോധന നടത്തുകയും കൃത്രിമമുണ്ടെന്ന് കണ്ടെത്തുകയും ചെയ്തു. അയോഗ്യത കൽപിച്ച് ഉത്തരവിറങ്ങും മുമ്പേ ചെയർപേഴ്സൺ രാജിവെയ്ക്കുകയും ചെയ്തു. തുടർന്നാണ് തിരഞ്ഞെടുപ്പിന് വേദിയൊരുങ്ങിയത്.
Discussion about this post