കൊയിലാണ്ടി: സംസ്ഥാന സർക്കാറിൻ്റെ മികച്ച പച്ചക്കറി കർഷകനുള്ള ജില്ലാതല പുരസ്കാരം കൊയിലാണ്ടി സ്വദേശിയായ പോലീസുകാരന്. കൊയിലാണ്ടി പോലീസ് സ്റ്റേഷനിൽ സീനിയർ സിവിൽ പോലീസ് ഓഫീസറായി (ഡ്രൈവർ) സേവനമനുഷ്ഠിക്കുന്ന നെല്ലിയുള്ളതിൽ താഴെ ഒ കെ സുരേഷ് ആണ് 2020-21 വർഷത്തെ മികച്ച കർഷകനുള്ള പുരസ്കാരത്തിന് അർഹനായത്.
കഴിഞ്ഞ ഏഴ് വർഷമായി കാർഷിക രംഗത്ത് സജീവമാണ് സുരേഷ്. പച്ചക്കറിയും വാഴയും നെല്ലും തുടങ്ങി എല്ലാ വിളകളും കൃഷി ചെയ്യുന്നുണ്ട്. നൂറിലേറെ മുട്ടക്കോഴികളെയും രണ്ടു മത്സ്യവും വളർത്തുന്നു. അലങ്കാര പക്ഷി വളർത്തലും ഉണ്ട്. പിതാവ് കുഞ്ഞിരാമൻ നായരിൽ നിന്നും പഠിച്ച കൃഷിപാഠങ്ങൾ പ്രവർത്തിപഥത്തിൽ കൊണ്ടുവരികയാണ് താൻ ചെയ്തതെന്ന് സുരേഷ് പറയുന്നു.
കൃഷി മാത്രമല്ല തനിക്ക് വഴങ്ങുകയെന്നും സുരേഷ് തെളിയിച്ചിട്ടുണ്ട്. കഴിഞ്ഞ അഞ്ചുവർഷമായി നമ്പ്രത്ത് കര യുപി സ്കൂളിലെ പിടിഎ പ്രസിഡണ്ട് ആണ് സുരേഷ്. അതുകൊണ്ടുതന്നെ കുട്ടികളോടൊപ്പം കലാ-സാഹിത്യ രംഗത്തും സജീവമായി. കഴിഞ്ഞവർഷം സ്കൂൾ വാർഷികത്തിന് ഒരു നാടകം എഴുതി സംവിധാനം ചെയ്ത് കുട്ടികളെ കൊണ്ട് അവതരിപ്പിച്ച് പ്രേക്ഷക ശ്രദ്ധ നേടി. അതിന് ശേഷം 5 കവിതകൾ എഴുതി.
നെൽകൃഷിയെ പറ്റി എന്റെ നെൽപ്പാടം , പുഴയോരം, തുലാവർഷം,മരമുത്തശ്ശി,കുട്ടിക്കാലം എന്നിവ . അതിൽ കുട്ടിക്കാലം ഏറെ ജനശ്രദ്ധ നേടി. ആശ്രമം സ്കൂളിൻ്റെ പ്രവേശനോത്സവ ഗാനവും ഏറെ ശ്രദ്ധ പിടിച്ചു പറ്റി ഇനിയും കൂടുതൽ എഴുതണമെന്നാണ് സുരേഷിൻ്റെ ആഗ്രഹം.
ശോഭയാണ് ഭാര്യ. മക്കൾ സൂര്യപ്രഭ യും സൂര്യനന്ദയും. കുടുംബമൊന്നാകെ കൃഷിയിൽ സഹായിക്കുന്നുണ്ട്.
Discussion about this post