കഴിഞ്ഞ മൂന്ന് വർഷത്തിനിടെ പൊതു വിദ്യാലയങ്ങളിലേക്കെത്തിയത് മൂന്ന് ലക്ഷത്തിലധികം വിദ്യാർഥികൾ, വിദ്യാഭ്യാസ രംഗത്ത് കേരളം കൈവരിച്ചത് അഭിമാനകരമായ നേട്ടം; മന്ത്രി വി ശിവൻകുട്ടി

പയ്യോളി: പൊതു വിദ്യാഭ്യാസ യജ്ഞത്തിൻ്റെ ഭാഗമായി നടപ്പിലാക്കിയ നയങ്ങൾ, വിദ്യാഭ്യാസ രംഗത്ത് മാറ്റത്തിൻ്റെ കാറ്റ് വീശാൻ ഇടയാക്കിയെന്ന് വിദ്യാഭ്യാസ മന്ത്രി വി ശിവൻ കുട്ടി പറഞ്ഞു. കഴിഞ്ഞ മൂന്ന് വർഷത്തിനിടയിൽ പൊതു വിദ്യാലയങ്ങളിലേക്ക് മൂന്ന് ലക്ഷത്തിലധികം വിദ്യാർഥികളാണ് എത്തിത്തുടങ്ങിയത്. ഇന്ത്യയിൽ, വിദ്യാഭ്യാസ രംഗത്ത് കേരളം അഭിമാനകരമായ നേട്ടം കൈവരിച്ചുവെന്നും അദ്ദേഹം പറഞ്ഞു.

കീഴൂർ ഗവ.യു പി സ്കൂളിൽ പൊതു വിദ്യാഭ്യാസ യജ്ഞത്തിന്റെ ഭാഗമായി കേരള സർക്കാർ അനുവദിച്ച ഒന്നേകാൽക്കോടി രൂപ ചെലവഴിച്ചു നിർമിച്ച ബഹുനില കെട്ടിടത്തിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.

എം എൽ എ കാനത്തിൽ ജമീല അധ്യക്ഷത വഹിച്ചു. യോഗത്തിൽ വടകര എം പി കെ മുരളീധരൻ മുഖ്യാതിഥിയായിരുന്നു. നഗരസഭാധ്യക്ഷൻ വടക്കയിൽ ഷഫീഖ് വാർഷിക പരിപാടി ഉദ്ഘാടനം ചെയ്തു.

സർവീസിൽ നിന്നു വിരമിക്കുന്ന അധ്യാപകൻ സി പി രഘുനാഥൻ മാസ്റ്റർക്ക് പൗരാവലി നല്കുന്ന ഉപഹാരം മന്ത്രി സമ്മാനിച്ചു. സ്കൂൾ ലോഗോ രൂപകല്പന ചെയ്ത എം ശ്രീഹർഷൻ മാസ്റ്റർക്ക് എം പി ഉപഹാരം നൽകി. കൊയിലാണ്ടി നിയോജക മണ്ഡലം മുൻ എം എൽ എ കെ ദാസനെ ചടങ്ങിൽ ആദരിച്ചു.

പ്രധാനാധ്യാപകൻ ഇ സുനിൽ കുമാർ റിപ്പോർട്ട് അവതരിപ്പിച്ചു. വിദ്യാഭ്യാസ സ്ഥിരം സമിതി അധ്യക്ഷൻ കെ ടി വിനോദൻ, നഗരസഭാംഗങ്ങളായ സി കെ ഷഹനാസ്, കാര്യാട്ട് ഗോപാലൻ, ഷജ്മിന അസ്സൈനാർ, മേലടി എ ഇ ഒ പി ഗോവിന്ദൻ,വി അനുരാജ്, കെ എം ശ്രീനി, പി കെ റഹീന,

വിവിധ രാഷ്ട്രീയ പാർട്ടി നേതാക്കളായ മഠത്തിൽ നാണു മാസ്റ്റർ, പി വി മനോജ്, മഠത്തിൽ അബ്ദുറഹിമാൻ, കാര്യാട്ട് നാരായണൻ, കെ ശശിധരൻ,സി പി രഘുനാഥൻ,ഇ എം ബിനു, സ്‌കൂൾ ലീഡർ എം നിവേദ് രാജ് പ്രസംഗിച്ചു.
മാതാണ്ടി അശോകൻ മാസ്റ്റർ സ്വാഗതവും ചന്ദ്രൻ തോട്ടത്തിൽ നന്ദിയും പറഞ്ഞു.

ചിത്രങ്ങൾ: സുരേന്ദ്രൻ പയ്യോളി