ഹോട്ടൽ മാലിന്യം പണിപൂർത്തിയാവാത്ത ഡ്രെയ്നേജിലേക്ക് ഒഴുക്കിയ ഹോട്ടൽ അടച്ചു പൂട്ടി നഗരസഭ ആരോഗ്യ വിഭാഗം: മാലിന്യ സംസ്കരണത്തിന് സൗകര്യമൊരുക്കിയതിന് ശേഷം തുറന്നാൽ മതിയെന്നും നിർദ്ദേശം

പയ്യോളി: ദുർഗന്ധം വമിക്കുന്ന ഹോട്ടൽ മാലിന്യം പണി പൂർത്തിയാവാത്ത ഡ്രെെെയ്നേജിലേക്ക് ഒഴുക്കിയ റസ്റ്റോറൻ്റിന് താഴ് വീണു. പയ്യോളി ദേശീയ പാതയിൽ മേലടിബ്ലോക്ക് ഓഫീസ് റോഡിന് സമീപം പ്രവർത്തിക്കുന്ന ബേക്ക് ഹോം റസ്റ്റോറൻ്റിനാണ് പ്രവർത്തനം നിർത്തിവെക്കാൻ പയ്യോളി നഗരസഭ ആരോഗ്യ വിഭാഗം നോട്ടീസ് നൽകിയത്. മാലിന്യ സംസ്കരണത്തിന് സൗകര്യമൊരുക്കി നഗരസഭ ആരോഗ്യ വിഭാഗത്തെ ബോധ്യപ്പെടുത്തിയതിന് ശേഷമേ പ്രവർത്തനം ആരംഭിക്കാൻ പാടുള്ളൂ എന്നും സ്ഥാപനത്തിന് കർശന നിർദ്ദേശം നൽകി.

ഇന്ന് (ചൊവ്വാഴ്ച) നടന്ന പരിശോധനയിൽ ആരോഗ്യ വിഭാഗത്തിന് നിയമ ലംഘനം ബോധ്യപ്പെടുകയും നടപടിയെടുക്കുകയുമായിരുന്നു. തുടർന്ന്, ഇവർ ഡ്രെയ്നേജിലേക്ക് മലിനജലം ഒഴുക്കാനായി ഉപയോഗിച്ച പി വി സി പൈപ്പ് അടച്ചു. സൗകര്യമൊരുക്കുന്നത് വരെ ഹോട്ടൽ അടച്ചിടാനും ഒപ്പം നിയമ ലംഘനത്തിന് പിഴയുമീടാക്കുമെന്നും എച്ച് ഐ ടി ചന്ദ്രൻ പയ്യോളി വാർത്തകളോട് പറഞ്ഞു.