പയ്യോളി നഗരസഭ കുടുംബശ്രീ ചെയർപേഴ്സൺ രാജിവെച്ചു; തിരഞ്ഞെടുപ്പ് കമ്മീഷൻ ഉത്തരവ് ഇറങ്ങുന്നതിന് മുമ്പുള്ള രാജി മുഖം രക്ഷിക്കാനെന്ന്

കുടുംബശ്രീ സി ഡി എസ് തിരഞ്ഞെടുപ്പിൽ 36 ൽ 30 വോട്ടുകൾ നേടിയാണ്, ഇടതുപക്ഷ സ്ഥാനാർഥിയായി റീത്ത ചെയർപേഴ്സൺ സ്ഥാനത്തേക്ക് മത്സരിച്ച് വിജയിച്ചത്. സർവ പിന്തുണയും പാർട്ടി നൽകിയിരുന്നുവെങ്കിലും ഹാജരാക്കിയ രേഖ തിരിച്ചടിക്കുമെന്ന് വന്നതോടെയാണ് മുഖം രക്ഷിക്കുന്നതിനായി രാജിവെക്കേണ്ടി വന്നത്. സംഭവം സി പി എമ്മിനും ക്ഷീണമായി.

ബി പി എൽ സംവരണ ഡിവിഷനായ 15 ൽ നിന്നും എ പി എൽ വിഭാഗത്തിലുള്ള റീത്ത സി ഡി എസിലേക്കെത്തിയത് 2009 ലെ ബി പി എൽ സാക്ഷ്യപത്രമുപയോഗിച്ചാണെന്നും അയോഗ്യയാക്കണമെന്നുമാവശ്യപ്പെട്ട് സി ഡി എസ് അംഗങ്ങളായ പി എം രാധയും എൻ സി സവിതയും നൽകിയ പരാതിയാണ് നടപടികളിലേക്കും ഒടുക്കം രാജിയിലേക്കും നയിച്ചത്. തിരഞ്ഞെടുപ്പ് കമ്മീഷൻ നടപടി എതിരാവുകയാണെങ്കിൽ റീത്തയ്ക്ക് സി ഡി എസ് അംഗത്വവും നഷ്ടപ്പെടും.