തിരുവനന്തപുരം: പെണ്സുഹൃത്തിനെ കാണാനെത്തിയ യുവാവിനെ ആഴിമലയില് കാണാതായ കേസില് യുവതിയുടെ ബന്ധുക്കള്ക്കെതിരേ കേസെടുത്തു. നരുവാമുട് മൊട്ടമൂട് വള്ളോട്ടുകോണം വീട്ടില് മധുവിന്റെയും മിനിയുടെയും മകന് കിരണിനെ(25)യാണ് ശനിയാഴ്ച ഉച്ചമുതല് കാണാതായത്.
അതിനിടെ കാണാതാകുന്നതിനുമുമ്പ് ആഴിമല പാറക്കെട്ടിന് സമീപത്തേക്കുള്ള വഴിയിലൂടെ ഓടിപ്പോകുന്ന കിരണിന്റെ സി.സി.ടി.വി. ദൃശ്യം പോലീസിന് ലഭിച്ചു.യുവതിയെ കാണാനെത്തിയ കിരണിനെയും സുഹൃത്ത് അനന്തു, ബന്ധു മെല്വിന് എന്നിവരെയും യുവതിയുടെ സഹോദരന് ഹരിയും സഹോദരീഭര്ത്താവ് രാജേഷും ചേര്ന്ന് മര്ദിച്ചതായി പോലീസ് പറയുന്നു.
തുടര്ന്ന് കിരണിനെ രാജേഷ് തന്റെ ബൈക്കില് കയറ്റിക്കൊണ്ടുപോയി. മറ്റുരണ്ടുപേരെയും ഹരിയുടെ കാറില് കയറ്റി ആഴിമല ജങ്ഷനിലെത്തിച്ചു എന്നാണ് പോലീസിനു ലഭിച്ച മൊഴി.രാജേഷ്, ഹരി എന്നിവര്ക്കെതിരേ യുവാക്കളെ മര്ദിച്ചതിനും ബലംപ്രയോഗിച്ച് തട്ടിക്കൊണ്ടുപോയതിനുമാണ് വിഴിഞ്ഞം പോലീസ് കേസ് എടുത്തത്. ഒളിവില്പ്പോയ പ്രതികളുടെ മൊബൈല്ഫോണ് നിശ്ചലമാണ്.
Discussion about this post