കോട്ടയം: കിടങ്ങൂര്‍ കുഞ്ചന്‍ നമ്പ്യാര്‍ സ്മാരക സാംസ്‌കാരിക സമിതിയുടെ ഈ വര്‍ഷത്തെ കുഞ്ചന്‍ നമ്പ്യാര്‍ ജനരഞ്ജന പുരസ്കാരം അഭയം ചാരിറ്റബിള്‍ സൊസൈറ്റി അധ്യക്ഷനും സംസ്ഥാന സഹകരണ – രജിസ്‌ട്രേഷന്‍ മന്ത്രിയുമായ വി എന്‍ വാസവന്. 10001 രൂപയും ശില്പവുമടങ്ങുന്ന പുരസ്കാരം ഏപ്രിൽ 26ന് കോട്ടയം പ്രസ് ക്ലബ്ബില്‍ രാവിലെ 11ന് നടക്കുന്ന സമ്മേളനത്തിൽ സംസ്ഥാന നിയമസഭാ സ്പീക്കര്‍ എം ബി രാജേഷ് സമ്മാനിക്കും.
അഭയം ചാരിറ്റബിള്‍ സൊസൈറ്റിയുടെ അദ്ധ്യക്ഷനെന്ന നിലയില്‍ ജനക്ഷേമ രംഗത്ത് കഴിഞ്ഞ കാലയളവില്‍ നടത്തിയ സ്തുത്യര്‍ഹമായ പ്രവര്‍ത്തനങ്ങളും കൊവിഡ് മഹാമാരികാലത്തും പ്രകൃതിദുരന്തമുഖത്തും കൈത്താങ്ങും കരുതലുമായി മാറിയ നിസ്വാര്‍ഥ മനുഷ്യസ്‌നേഹി എന്ന നിലയിലുള്ള സേവനങ്ങളെ അനുസ്മരിച്ചും നവലോകം പ്രസിഡന്റ് എന്ന നിലയില്‍ കലാസാംസ്‌കാരിക രംഗത്തു നല്കിയ സംഭാവനകളെയും മുന്‍നിര്‍ത്തിയാണ് മന്ത്രി വി എന്‍ വാസവന് അവാര്‍ഡ് നൽകുന്നതെന്ന് ഭാരവാഹികൾ പറഞ്ഞു.
സാമവേദാചാര്യന്‍ ഡോ. തോട്ടം ശിവകരന്‍ നമ്പൂതിരി അദ്ധ്യക്ഷനായും സൗദി മീഡിയ പ്രവര്‍ത്തകനും അനലിസ്റ്റുമായ എസ്. സനില്‍കുമാര്‍, രാജാ ശ്രീകുമാർ വര്‍മ്മ, രാജു ആനിക്കാട്, സഞ്ജീവ് വി.പി നമ്പൂതിരി എന്നിവരടങ്ങിയ ജഡ്ജിങ് കമ്മിറ്റിയാണ് വി എന്‍ വാസവനെ കുഞ്ചന്‍ നമ്പ്യാര്‍ സ്മാരക ജനരഞ്ജന പുരസ്‌കാരത്തിനായി തെരഞ്ഞെടുത്തത്.
Discussion about this post