ഇന്ത്യക്കാരിയാണ്, പക്ഷെ പൂനം ഗുപ്ത അത്ര സുപരിചിത ആയിരുന്നില്ല. എന്നാൽ കഴിഞ്ഞ കുറച്ചു മണിക്കൂറുകളായി പൂനം സോഷ്യൽ മീഡിയകളിൽ വൈറലാണ്. ലോകത്ത് തങ്ങളുടെ വ്യക്തി മുദ്ര പതിപ്പിക്കാൻ ആഗ്രഹിക്കുന്നവർക്ക് പ്രചോദനമായി മാറുകയാണ് ഇവർ. 2002 ൽ ഇന്ത്യയിൽ നിന്ന് സ്‌കോട്ട്ലൻഡിലേക്ക് കുടിയേറിയ പൂനം ഇന്ന് 1000 കോടിയിലധികം വരുന്ന സാമ്രാജ്യത്തിന്റെ അവകാശിയാണ്. ഇന്ത്യയിൽ സുപരിചിത അല്ലെങ്കിലും യുണൈറ്റഡ് കിംഗ്ഡത്തിലെ ഏറ്റവും അറിയപ്പെടുന്ന വനിതാ സംരംഭകരിൽ ഒരാളാണ് പൂനം.
അടുത്തിടെ ഒരു എൻആർഐ പരിപാടിയിൽ പങ്കെടുക്കാൻ പൂനം ഇന്ത്യയിലെത്തിയതോടെയാണ് ഈ പേര് സോഷ്യൽ മീഡിയയിൽ ട്രെൻഡ് ആകാൻ തുടങ്ങിയത്. ഭർത്താവിന് 1.5 കോടി രൂപയുടെ ജോലി നൽകിയ കഥയാണ് പിന്നെ ഉയർന്നു കേട്ടത്. ഒരിക്കൽ അവൾ ഭർത്താവിനോട് തന്റെ ബിസിനസിൽ ചേരാൻ ആവശ്യപ്പെട്ടു. എന്നാൽ പൂനത്തിന് തന്നെ തങ്ങാൻ കഴിയില്ലെന്നു ഭർത്താവ് പറഞ്ഞു. അങ്ങനെയാണ് തന്റെ ഭർത്താവിന്റെ വാർഷിക ശമ്പളം 80 ലക്ഷം രൂപയാണെന്ന് അവർ മനസിലാക്കിയത്.
പൂനം തന്റെ ബിസിനസിൽ കൂടുതൽ ശ്രദ്ധ നൽകി. ബിസിനസ് വളർന്നു. അങ്ങനെ ഭർത്താവിന് 1.5 കോടി രൂപ ശമ്പളം നൽകാൻ പ്രാപ്തയായി അവൾ. ആരോഗ്യ മേഖലയിൽ ജോലി ചെയ്തിരുന്ന പുനീത് ഗുപ്തയെ 2002ൽ സ്‌കോട്ട്‌ലാൻഡിൽ വച്ചാണ് പൂനം വിവാഹം ചെയ്തത്. എംബിഎ ബിരുദധാരിയായിരുന്ന പൂനത്തിന് എക്‌സ്പീരിയൻസ് ഇല്ലെന്നു പറഞ്ഞ് ആരും ജോലി നൽകാതെ വന്നതോടെയാണ്, സ്വന്തമായി ബിസിനസ് തുടങ്ങാൻ തീരുമാനിച്ചത്.
തുടർന്നുള്ള വിപണി ഗവേഷണത്തിൽ യൂറോപ്യൻ, അമേരിക്കൻ കമ്പനികൾ മികച്ച രീതിയിൽ ഉൽപ്പന്നങ്ങൾ വിപണിയിലെത്തിക്കാൻ ടൺ കണക്കിന് പേപ്പറുകൾ ഉപയോഗിക്കുന്നുവെന്ന് അവർ തിരിച്ചറിഞ്ഞത്. വെറും സ്‌ക്രാപ്പ് ആയി മാറുന്ന ഈ പേപ്പർ ഡിസ്‌പോസ് ചെയ്യാൻ ഈ കമ്പനികൾ കോടികൾ ചെലവഴിക്കുന്നുവെന്ന് മനസിലാക്കിയതോടെ പൂനത്തിലെ സംരംഭക ഉണർന്നു. ഈ വേസ്റ്റ് പേപ്പർ റീസൈക്കിൾ ചെയ്ത് വീണ്ടും ഉപയോഗിക്കാമെന്ന് അവർ 10 മാസത്തെ ഗവേഷണത്തിലൂടെ കണ്ടെത്തി.
ഇറ്റലി, ഫിൻലാൻഡ്, സ്വീഡൻ, യുണൈറ്റഡ് സ്റ്റേറ്റ്‌സ് എന്നിവിടങ്ങളിലെ കമ്പനികളിൽ നിന്ന് അവൾ സ്‌ക്രാപ്പ് പേപ്പർ വാങ്ങാൻ തുടങ്ങി. അവളുടെ ആദ്യത്തെ ക്ലയന്റ് ഒരു ഇറ്റാലിയൻ കമ്പനിയായിരുന്നു. സ്‌ക്രാപ് പേപ്പർ എങ്ങനെ ഡിസ്‌പോസ് ചെയ്യുമെന്ന് കരുതിയിരുന്ന കമ്പനിക്ക് പൂനത്തിന്റെ സമീപനം നേട്ടമായി തോന്നി. ഇതിനകം അവർ ഇന്ത്യയിൽ ഒരു വാങ്ങലുകാരനെ കണ്ടെത്തിയിരുന്നു. ആദ്യ ഇടപാടിൽ രണ്ടു കണ്ടെയ്‌നറുകൾക്ക് അവൾക്ക് 40 ലക്ഷം രൂപ നേടി.
2004-ൽ അവർ സ്‌കോട്ട്‌ലൻഡിൽ പിജി പേപ്പർ എന്ന കമ്പനി രജിസ്റ്റർ ചെയ്തു. അവളുടെ ലാഭം ക്രമാതീതമായി വർധിച്ചു. ബിസിനസ് വളർന്നതോടെ അവൾക്ക് സഹായം വേണ്ടി വന്നു. അങ്ങനെയാണ് അവർ പുനീതിന്റെ സഹായം അഭ്യർത്ഥിച്ചത്. പൂനത്തിന്റെ നിർബന്ധത്തെ തുടർന്ന് പുനീത് കമ്പനിയിൽ പാർട്ട്‌ടൈം ജോലി ചെയ്യാൻ സമ്മതിച്ചു. ആറു മാസത്തിനുള്ളിൽ തന്നെ അ‌ത് ഫുൾടൈം ആയി മാറി. തുടർന്നു പൂനം പുനീതിന് 1.50 കോടി രൂപയുടെ പാക്കേജ് വാഗ്ദാനം ചെയ്തു.
തുടർന്ന് ദമ്പതികൾ നിർമ്മാണം, ഐടി, ഹോസ്പിറ്റാലിറ്റി ബിസിനസുകളിലും തങ്ങളുടെ കൈകൾ പരീക്ഷിച്ചു. അധികം വൈകാതെ കമ്പനിയുടെ ആസ്തി 1000 കോടി രൂപയിലധികമായി. തന്റെ കമ്പനിയുടെ ആസ്തി ഒരു ലക്ഷം കോടി രൂപയാക്കണമെന്ന ലക്ഷ്യത്തിലാണ് ഇന്ന് ഇവരുടെ പ്രവർത്തനം. അവർക്ക് ഇപ്പോൾ 9 കമ്പനികൾ സ്വന്തമായുണ്ട് കൂടാതെ 7 രാജ്യങ്ങളിൽ ഓഫീസുകളുണ്ട്. പൂനം വീട്ടിൽ ആരംഭിച്ച ബിസിനസ്, 2015 മുതൽ സ്‌കോട്ട്ലൻഡിലെ ഗ്രീനോക്കിലുള്ള കസ്റ്റം ഹൗസിലാണു പ്രവർത്തിക്കുന്നത്.
Discussion about this post