ബെംഗളൂരു: കർണാടകയിലെ ബെളഗാവിയിൽ വീട്ടമ്മയെ വീട്ടിൽ നിന്ന് വലിച്ചിറക്കി, നഗ്നയാക്കി, തൂണിൽ കെട്ടിയിട്ട് മർദിച്ചു. ഞായറാഴ്ച രാത്രിയാണ് സംഭവം. ഇവരുടെ മകന്‍ ഒരു പെൺകുട്ടിക്കൊപ്പം ഒളിച്ചോടിയിരുന്നു. പിന്നാലെ, പെൺകുട്ടിയുടെ വീട്ടുകാരെത്തിയാണ് യുവതിയെ ആക്രമിച്ചതെന്ന് പൊലീസ് വ്യക്തമാക്കി.
സംഭവത്തിൽ നേരിട്ടു പങ്കുള്ള ഏഴു പേരെ പൊലീസ് അറസ്റ്റ് ചെയ്തതായും ഇവരെ ഉടൻ കോടതിയിൽ ഹാജരാക്കുമെന്നും കർണാടക ആഭ്യന്തര മന്ത്രി ജി പരമേശ്വര പറഞ്ഞു. യുവതി ആശുപത്രിയിൽ ചികിത്സയിലാണ്. യുവതിയുടെ മകന്‍ പെൺകുട്ടിയുമായി കുറച്ചുകാലമായി അടുപ്പത്തിലായിരുന്നു. പെൺകുട്ടി ഒളിച്ചോടിയെന്ന വാർത്തയറിഞ്ഞതിനു പിന്നാലെ, പെൺകുട്ടിയുടെ വീട്ടുകാർ ആൺകുട്ടിയുടെ വീട്ടിലേക്ക് ഓടിയെത്തി.
തുടർന്ന് ആൺകുട്ടിയുടെ അമ്മയെ വീടിന് പുറത്തേക്ക് വലിച്ചിഴച്ച ശേഷം അവരെ നഗ്നയാക്കി തൂണിൽ കെട്ടിയിട്ട് മർദിക്കുകയായിരുന്നു. സംഭവം അറിഞ്ഞെത്തിയ പൊലീസാണ് യുവതിയെ ആശുപത്രിയിൽ പ്രവേശിപ്പിച്ചത്. യുവതിയെ ആശുപത്രിയിലെത്തി സന്ദർശിക്കുമെന്നും മന്ത്രി അറിയിച്ചു.
Discussion about this post