തിരുവനന്തപുരം: ബ്രുവറി കേസില് സര്ക്കാരിന് കനത്ത തിരിച്ചടി നികുതി വകുപ്പില് നിന്ന് ഫയലുകള് വിളിച്ചു വരുത്തണമെന്ന രമേശ് ചെന്നിത്തലയുടെ ഹര്ജി തിരുവനന്തപുരം വിജിലന്സ് പ്രത്യേക കോടതി അനുവദിച്ചു. സാക്ഷിമൊഴി രേഖപ്പെടുത്തരുതെന്ന സര്ക്കാര് ഹര്ജി തള്ളി.
ഇത് സംബന്ധിച്ച ക്രമക്കേട് നടന്നിട്ടുണ്ടെന്നും നികുതി വകുപ്പിലെ ഫയലുകള് വിളിച്ചുവരുത്തണമെന്നും ആവശ്യപ്പെട്ട് മുന് പ്രതിപക്ഷ നേതാവ് രമേശ് ചെന്നിത്തല വിജിലന്സ് കോടതിയില് ഹര്ജി നല്കിയിരുന്നു. ഇത് പരിഗണിച്ച് ഫയലുകള് വിളിച്ചുവരുത്താന് കോടതി അനുമതി നല്കി.
ക്രമക്കേട് നടന്നിട്ടില്ലെന്നും ഹര്ജി തള്ളണമെന്നും സാക്ഷിമൊഴികള് രേഖപ്പെടുത്താന് അനുവദിക്കരുതെന്നും സര്ക്കാര് എതിര് ഹര്ജി നല്കിയരുന്നെങ്കിലും കോടതി തള്ളി. രമേശ് ചെന്നിത്തലയുടെ ആവശ്യം കോടതി അംഗീകരിച്ചതോടെ ഇത് സംബന്ധിച്ച വിശദാംശങ്ങള് അദ്ദേഹത്തിന് ലഭിക്കും.
കേസുമായി ബന്ധപ്പെട്ട രേഖകള് ഹര്ജിക്കാരനായ രമേശ് ചെന്നിത്തലയ്ക്ക് നല്കണം.ജൂലൈ 17 ന് വിസ്താരം തുടരും.ഒന്നാം പിണറായി സര്ക്കാരിന്റെ കാലത്ത് ബ്രൂവറികള് അനുവദിക്കാനുള്ള നീക്കത്തിനു പിന്നില് അഴിമതിയുണ്ടെന്നാരോപിച്ചാണ് അന്നത്തെ പ്രതിപക്ഷ നേതാവായിരുന്ന രമേശ് ചെന്നിത്തല കോടതിയെ സമീപിച്ചത്.
മുഖ്യമന്ത്രിയുടെ താല്പര്യ പ്രകാരം മുന് എക്സൈസ് മന്ത്രി ടി. പി. രാമകൃഷ്ണന് അനധികൃതമായി തീരുമാനമെടുത്തു ഇത് അഴിമതിയാണ് എന്നാണ് രമേശ് ചെന്നിത്തലയുടെ ആരോപണം.
Discussion about this post