കോഴിക്കോട്: അഞ്ചുദിവസം മുമ്പ് കാണാതായ മകനെ പിതാവിന് റെയില്വേ സ്റ്റേഷനില് നിന്ന് അപ്രതീക്ഷിതമായി തിരിച്ചുകിട്ടി. പുത്തനത്താണിയില് നിന്ന് കാണാതായ 15-വയസ്സുകാരനെയാണ് കോഴിക്കോട് റെയില്വേ സ്റ്റേഷനില് വച്ച് പിതാവിന് തിരിച്ചുകിട്ടിയത് അതും കുട്ടിയെ കടത്തിക്കൊണ്ടുപോയ ആള്ക്കൊപ്പം. 18-ാം തിയതി രാവിലെ താനൂരിലെ വീട്ടില് നിന്ന് സ്കൂളിലേക്ക് പോയ മകന് തിരിച്ച് വരാതായതോടെയാണ് രക്ഷിതാക്കള് അന്വേഷണം തുടങ്ങിയത്. കല്പ്പകഞ്ചേരി സ്റ്റേഷനില് പരാതിയും നല്കി.
ഇന്നലെ തെരച്ചിലിന്റെ ഭാഗമായി കോഴിക്കോട് റെയില്വേ സ്റ്റേഷനിലെത്തിയതാണ് പിതാവ്. സ്റ്റേഷന് മുന്നില് നില്ക്കുമ്പോള് മകന്റെ കൈ പിടിച്ച് ഒരാള് പോകുന്നത് ശ്രദ്ധയില്പ്പെട്ടു. അയാളെ തടഞ്ഞുനിര്ത്തിയപ്പോള് കുട്ടിയേ അവന്റെ അമ്മയുടെ അടുത്തേക്ക് കൊണ്ടുപോവുകയാണെന്ന മറുപടിയാണ് കിട്ടിയത്. തുടര്ന്ന് രക്ഷിതാവ് അയാളെ പിന്തുടരുകയും ടൗണ് പോലീസ് സ്റ്റേഷനില് വിവരം അറിയിക്കുകയും ചെയ്തു.ടൗണ് പോലീസ് എത്തി കാസര്ക്കോഡ് ചെങ്കള സ്വദേശിയായ അബ്ബാസിനെ കസ്റ്റഡിയില് എടുക്കുകയും കല്പ്പകഞ്ചേരി പോലീസിന് കൈമാറുകയും ചെയ്തു.
Discussion about this post