വയോധികയെ മരുമകള്‍ ക്രൂരമായി മർദിച്ചു; കേസെടുത്ത് പോലീസ്

കൊല്ലം: വയോധികയെ മരുമകള്‍ ക്രൂരമായി മർദിച്ചു. കരുനാഗപ്പള്ളി തേവലക്കര സ്വദേശി 80 വയസുകാരി ഏലിയമ്മ വർഗീസിനാണ് മരുമകളുടെ മർദനമേറ്റത്. സംഭവത്തില്‍ തെക്കുംഭാഗം പൊലീസ് കേസെടുത്തു. മരുമകൾ മഞ്ജുമോൾ തോമസിനെ പൊലീസ് കസ്റ്റഡിയിലെടുത്തിട്ടുണ്ട്.

കുടുംബ വഴക്കിനെ തുടർന്നാണ് മഞ്ചുമോൾ ഭർത്താവിന്റെ അമ്മയെ ക്രൂരമായി മർദിച്ചത്. മര്‍ദനത്തിന്‍റെ ദൃശ്യങ്ങള്‍ സമൂഹ മാധ്യമങ്ങളിലൂടെ പ്രചരിച്ചിരുന്നു. ദൃശ്യങ്ങൾ ഒരു വർഷം മുൻപ് ഉള്ളതാണെന്നാണ് പൊലീസ് പറയുന്നത്. കഴിഞ്ഞ ദിവസം ഏലിയാമ്മയെ മഞ്ചുമോൾ വീണ്ടും മർദിക്കുകയായിരുന്നു. ഇതിൽ കൈക്കും കാലിനും പരിക്കേറ്റു. മർദനം തുടർന്നതോടെയാണ് ഏലിയാമ്മ തെക്കുംഭാഗം പൊലീസിൽ പരാതി നൽകിയത്.

നാട്ടുകാരിൽ ഒരാൾ വീട്ടിൽ നടന്ന മർദന ദൃശ്യങ്ങൾ പൊലീസിന് കൈമാറി. ഇതോടെയാണ് പൊലീസിനു കാര്യങ്ങളുടെ ഗൗരവം മനസിലായത്. പ്രൈവറ്റ് സ്കൂളിലെ അധ്യാപിക ആയ മഞ്ജുമോളെ പൊലീസ് കസ്റ്റഡിയിൽ എടുത്ത് ചോദ്യം ചെയ്യുകയാണ്. എലിയാമ്മയുടെ മകനെയും പൊലീസ് ചോദ്യം ചെയ്യും. മഞ്ജുമോളെ അറസ്റ്റ് ചെയ്യുമെന്നാണ് ലഭിക്കുന്ന സൂചന.