കോപ്പന്‍ഹേഗന്‍: ഖുര്‍ആന്‍ പരസ്യമായി കത്തിക്കുന്നത് നിരോധിച്ചുകൊണ്ടുള്ള നിയമം പാസാക്കി ഡെന്മാര്‍ക്ക്. 77നെതിരെ 94 വോട്ടുകള്‍ക്കാണ് ഡെന്മാര്‍ക്ക് പാര്‍ലമെന്റ് നിയമം പാസാക്കിയത്. ഡെന്മാര്‍ക്കില്‍ നടന്ന ചില പ്രതിഷേധങ്ങളില്‍ ഖുര്‍ആന്‍ പരസ്യമായി കത്തിച്ചിരുന്നു. ഇതേത്തുടര്‍ന്ന് മുസ്ലിം രാജ്യങ്ങളുമായുണ്ടായ പ്രശ്‌നങ്ങള്‍ പരിഹരിക്കാനായാണ് ഡെന്മാര്‍ക്ക് പുതിയ നിയമം കൊണ്ടുവന്നത്.
‘ഖുര്‍ആനോ മുസ്ലിം രാജ്യങ്ങളുടെ പതാകയോ കത്തിച്ച 500-ലേറെ സംഭവങ്ങളാണ് ജൂലൈ മുതല്‍ റിപ്പോര്‍ട്ട് ചെയ്തത്. മറ്റ് രാജ്യങ്ങളുമായുള്ള ഡെന്മാര്‍ക്കിന്റെ ബന്ധത്തില്‍ വിള്ളലുണ്ടാക്കാന്‍ ഇത്തരം പ്രതിഷേധങ്ങള്‍ കാരണമാകും. നമ്മുടെ താല്‍പ്പര്യങ്ങളെയും ആത്യന്തികമായി നമ്മുടെ സുരക്ഷയേയും അത് ബാധിക്കും’, ഡെന്മാര്‍ക്ക് നീതിന്യായ വകുപ്പ് മന്ത്രി പീറ്റര്‍ ഹമെല്‍ഗാഡ് പറഞ്ഞു.
ചൂടേറിയ ചര്‍ച്ചകള്‍ക്കൊടുവിലാണ് പാര്‍ലമെന്റില്‍ നിയമം പാസായത്. പുതിയ നിയമപ്രകാരം ഡെന്മാര്‍ക്കില്‍ ഖുര്‍ആന്‍ പരസ്യമായി കത്തിക്കുന്നത് പിഴ ഈടാക്കുകയോ രണ്ട് വര്‍ഷം വരെ തടവുശിക്ഷ ലഭിക്കുകയോ ചെയ്യാവുന്ന കുറ്റമാണ്. കഴിഞ്ഞ ഓഗസ്റ്റിലാണ് ഇത്തരമൊരു നിയമത്തെ കുറിച്ച് ഡെന്മാര്‍ക്ക് ആലോചിക്കുന്നത്. ആഴ്ചകള്‍ക്കിടെ വിദേശരാജ്യങ്ങളുടെ എംബസികള്‍ക്ക് മുന്നില്‍വെച്ച് ഖുര്‍ആന്‍ കത്തിച്ച് പ്രതിഷേധിച്ച 170-ലേറെ സംഭവങ്ങള്‍ റിപ്പോര്‍ട്ട് ചെയ്തതിന്റെ പശ്ചാത്തലത്തിലായിരുന്നു ഇത്. ലോകത്തിന് ഒരു സന്ദേശം നല്‍കേണ്ടതായുണ്ട് എന്നാണ് മന്ത്രിമാര്‍ അന്ന് ഇതേക്കുറിച്ച് പറഞ്ഞത്.
Discussion about this post