തിരുവനന്തപുരം: കൊവിഡ് – 19 വ്യാപനം കുറഞ്ഞ പശ്ചാത്തലത്തില് മാസ്ക് ഒഴിവാക്കുന്നത് സംബന്ധിച്ച് സര്ക്കാര് ആലോചന തുടങ്ങി. കൊവിഡ് പ്രതിരോധത്തിനായി രൂപീകരിച്ച വിദഗ്ധ സമിതിയിലെ അംഗങ്ങളോടും മറ്റ് ആരോഗ്യവിദഗ്ധരോടും സര്ക്കാര് ഇതുമായി ബന്ധപ്പെട്ട് അഭിപ്രായം ആരാഞ്ഞു.
മാസ്ക് നിര്ബന്ധമായി ധരിക്കണമെന്ന നിബന്ധന ഒഴിവാക്കണമെന്നും മാസ്ക് ഒഴിവാക്കുന്നതില് പ്രശ്നമില്ലെന്നുമാണ് വിദഗ്ധസമിതി നിര്ദേശിച്ചതെന്ന് അറിയുന്നു. കൊവിഡിന്റെ പുതിയ തരംഗം ഉണ്ടാകാത്ത സാഹചര്യമാണെങ്കില് മാസ്കുകള് ഒഴിവാക്കാവുന്നതാണെന്ന് ആരോഗ്യ വകുപ്പ് അധികൃതരും അഭിപ്രായപ്പെടുന്നു.
താല്പര്യമുള്ളവര്ക്കു തുടര്ന്നും മാസ്ക് ധരിക്കാം. രോഗലക്ഷണങ്ങളുള്ളവര് പുറത്തിറങ്ങുമ്പോള് മാസ്ക് ധരിക്കണമെന്ന നിര്ദേശം വയ്ക്കണമെന്നും വിദഗ്ധസമിതി സര്ക്കാരിനെ അറിയിച്ചിട്ടുണ്ട്. ആള്ക്കൂട്ടം ഉണ്ടാവാനിടയുള്ള സാഹചര്യങ്ങൾ, ആഘോഷങ്ങള്, അതിതീവ്ര വ്യാപന സാധ്യതയുള്ള പ്രദേശങ്ങള്, എന്നിവിടങ്ങളിൽ മാസ്ക് നിര്ബന്ധമാണ്. ഇതു സംബന്ധിച്ച് അവസാന തീരുമാനമെടുക്കേണ്ടത് മുഖ്യമന്ത്രിയുടെ അധ്യക്ഷതയില് ചേരുന്ന കൊവിഡ് അവലോകന യോഗമാണ്.
Discussion about this post