പയ്യോളി: ദേശീയപാതാ വികസനത്തിൻ്റെ ഭാഗമായി പാതയോരത്തെ കെട്ടിടങ്ങൾ പൊളിച്ചുമാറ്റുന്നതിനിടെ, പയ്യോളി ടൗണിലെ പഴയ കെ ഡി സി ബാങ്ക് കെട്ടിടം ജീവന് ഭീഷണിയായി മാറിയിരുന്നു.

ആദ്യം കരാറെടുത്തവർ മൂന്നു നില കെട്ടിടത്തിൻ്റെ താഴത്തെ നിലയിലെ ചുവരും പില്ലറുകളും പൊളിച്ചുമാറ്റിയതോടെയാണ് കെട്ടിടം ഏതു നിമിഷവും വീഴാൻ പാകത്തിലായത്.

ശക്തമായ കാറ്റോ മഴയോ പോലും കെട്ടിടത്തെ നിലം പതിപ്പിക്കുമായിരുന്നു. ഇത് സംബന്ധിച്ച് കഴിഞ്ഞ ദിവസം പയ്യോളി വാർത്തകൾ റിപ്പോർട്ട് ചെയ്തിരുന്നു.

ഇതോടെയാണ് ഭീഷണി കണക്കിലെടുത്ത് കെട്ടിടം യുദ്ധകാലാടിസ്ഥാനത്തിൽ പൊളിച്ചുമാറ്റിയത്. വാർത്ത ചർച്ചയായതോടെ കഴിഞ്ഞ ദിവസം രാത്രി തന്നെ താഴത്തെ നിലയ്ക്കടുത്ത് മണ്ണ് നിറച്ച് ഇന്നലെ ഉച്ചയോടെ കെട്ടിടത്തിൻ്റെ മുകൾ ഭാഗം പൊളിക്കാൻ ആരംഭിച്ചു.

ദേശീയ പാതയിൽ തിരക്കേറിയ സമയമായത് കാരണം വൈകീട്ട് 5 മണിയോടെ, നഗരസഭാധ്യക്ഷൻ ഷഫീഖ് വടക്കയിൽ, പയ്യോളി എസ് ഐ പി എം സുനിൽകുമാർ എന്നിവരുടെ നേതൃത്വത്തിൽ പണി നിർത്തിവെപ്പിച്ചു.

തുടർന്ന് രാത്രി വൈകിയാണ് ജോലി പുനഃരാരംഭിച്ചത്. ജീവന് ഭീഷണിയായ മുകൾ നിലകൾ പൂർണമായും രാത്രി തന്നെ പൊളിച്ചു മാറ്റി, മൺകൂനയാക്കി. അതോടെ ഒരാഴ്ചയോളം ജനങ്ങളെ ഭീതിയുടെ മുൾമുനയിൽ നിർത്തിയ പ്രശ്നത്തിന് പരിഹാരമായി.

Discussion about this post