പിണറായി(കണ്ണൂര്): മരിച്ചെന്ന് വിധിയെഴുതിയ 67-കാരന് മോര്ച്ചറിയിലേക്ക് മാറ്റുന്ന വഴിയില് പുതുജീവന്. പാച്ചപ്പൊയ്ക വനിതാ ബാങ്കിന് സമീപം പുഷ്പാലയത്തില് വെള്ളുവക്കണ്ടി പവിത്രനാണ് മരണത്തില്നിന്ന് തലനാരിഴയ്ക്ക് ജീവിതം തിരികെപ്പിടിച്ചത്. പക്ഷാഘാതവും ശ്വാസകോശ സംബന്ധമായ അസുഖവും കാരണം തിങ്കളാഴ്ച പുലര്ച്ചെയാണ് മംഗളൂരുവിലെ സ്വകാര്യ ആസ്പത്രിയില് പ്രവേശിപ്പിച്ചത്.
വെന്റിലേറ്ററിന്റെ സഹായത്തോടെയാണ് ജീവന് നിലനിര്ത്തിയിരുന്നത്. എന്നാല്, ആരോഗ്യനിലയില് പുരോഗതിയില്ലാത്തതിനാല് വെന്റിലേറ്ററിന്റെ സഹായം ഒഴിവാക്കുകയാണെന്ന് തിങ്കളാഴ്ച വൈകീട്ട് ആശുപത്രി അധികൃതര് ബന്ധുക്കളെ അറിയിച്ചു.
മരണം സ്ഥിരീകരിച്ചതിനെത്തുടര്ന്ന് വിവരം ആശുപത്രിയില് കൂടെയുണ്ടായിരുന്നവര് നാട്ടുകാരെയും ബന്ധുക്കളെയും വിളിച്ചറിയിച്ചു. തിങ്കളാഴ്ച വൈകീട്ട് 6.30-ന് മംഗളൂരുവില്നിന്ന് പവിത്രനെയും കൊണ്ട് ആംബുലന്സ് നാട്ടിലേക്ക് തിരിച്ചു. രാത്രി വൈകിയതിനാല് ‘മൃതദേഹം’ കണ്ണൂരിലെ എ.കെ.ജി. ആശുപത്രി മോര്ച്ചറിയിലേക്ക് മാറ്റാനായിരുന്നു തീരുമാനം.
Discussion about this post