പാലക്കാട്: അട്ടപ്പാടി മധു കൊലക്കേസില് സാക്ഷി വിസ്താരം ഇന്ന് അവസാനിക്കും. രണ്ട് തവണ പ്രോസിക്യൂട്ടര്മാര് മാറിയ കേസില് 101 സാക്ഷികളെയാണ് ഇത് വരെ വിസ്തരിച്ചത്. അന്നത്തെ ഒറ്റപ്പാലം സബ് കളക്ടറായ മജിസ്റ്റീരിയല് അന്വേഷണം നടത്തിയ ജെറോമിക് ജോര്ജ്ജിന്റെ വിസ്താരത്തോടെയാണ് സാക്ഷി വിസ്താരം അവസാനിക്കുക. 2022 ഏപ്രിലിലാണ്
വിചാരണ നടപടികള് ആരംഭിച്ചത്. സാക്ഷികളെ സ്വാദീനിക്കല്, കൂറുമാറിയവരെ വിസ്തരിക്കല്, പുനര് വിസ്താരത്തില് മൊഴി തിരുത്തല്, മധുവിന്റെ കുടുംബത്തെ ഭീഷണിപ്പെടുത്തല്, ഭീഷണിപ്പെടുത്തിയവരുടെ അറസ്റ്റ് തുടങ്ങി പ്രതിസന്ധി തീര്ക്കുന്ന അസാധാരണ നടപടികള് ഏറെയുണ്ടായിരുന്നു ഈ കേസിന്റെ വിചാരണയില്. മധു
വധക്കേസില് പുനരന്വേഷണം നടത്തി കുറ്റപത്രം സമര്പ്പിച്ച ഡിവൈഎസ്പി പി ശശികുമാറിനെ കഴിഞ്ഞ ദിവസം വിസ്തരിച്ചിരുന്നു. കോടതിയില് രഹസ്യ മൊഴി നല്കിയവര് ഉള്പ്പെടെ 24 സാക്ഷികളായിരുന്നു ഈ കേസില് കൂറുമാറിയത്. 2018 ഫെബ്രുവരി 22 നാണ് ഒരു സംഘം അക്രമികള് ആദിവാസി യുവാവായ മധുവിനെ മര്ദ്ദിച്ച് കൊലപ്പെടുത്തുന്നത്.
Discussion about this post