പുറക്കാട് അകലാപ്പുഴയിൽ തോണി മറിഞ്ഞ് കാണാതായത് മുചുകുന്ന് സ്വദേശിയെ ; തിരച്ചിൽ തുടരുന്നു

പുറക്കാട് : പുറക്കാട് അകലാപ്പുഴയിൽ ഫൈബർ വള്ളം മറിഞ്ഞു കാണാതായത് മുചുകുന്ന് സ്വദേശി കേളോത്ത് മീത്തൽ താമസിക്കും പുതിയോട്ടിൽ അസൈനാറിന്റെ മകൻ അഫ്‌നാസ് (22) നെ. ഇന്ന് വൈകീട്ട് 5 മണിയോടെയാണ് സംഭവം. 4 പേരടങ്ങിയ സംഘം സഞ്ചരിച്ച ഫൈബർ വള്ളം മറിയുകയായിരുന്നു. 3 പേർ രക്ഷപ്പെട്ടിട്ടുണ്ട്.

നങ്ങ്യാരണ്ടി ശ്രീഷു മാസ്റ്ററുടെ മകൻ നിവേദ് (23), പുതിയോട്ടിൽ ഇസ്മായിലിന്റെ മകൻ നിയാസ് (23), ശബ്നം ഗഫൂറിന്റെ മകൻ ഷഹീൻ (19) എന്നിവരെയാണ് രക്ഷപ്പെടുത്തിയത്. കാണാതായ അഫ്നാസിന് വേണ്ടിയുള്ള തിരച്ചിൽ ഇപ്പോഴും തുടരുകയാണ്. രക്ഷപ്പെട്ട 3 പേരും ചേർന്ന് അഫ് നാസിനെ കരയ് ക്കെത്തിക്കാൻ ശ്രമം നടത്തിയെങ്കിലും കരയിൽ നിന്ന് 50 മീറ്റർ അകലെ ശ്രമം വിഫലമാവുകയായിരുന്നു.

നാല് പേരും മുചുകുന്ന് സ്വദേശികളാണ്. നാല് പേർക്കും നീന്തൽ അറിയാമായിരുന്നു എന്നാണ് നാട്ടുകാർ പറയുന്നത്. ചില ദിവസങ്ങളിൽ ഇവർ ഇത്തരത്തിൽ ഇതേ വള്ളത്തിൽ പുഴയിൽ സഞ്ചരിക്കാറുണ്ടെന്നും പ്രദേശ വാസികൾ പറയുന്നു. കൊയിലാണ്ടി തഹസിൽദാർ സി പി മണി, കൊയിലാണ്ടി സബ് ഇൻസ്‌പെക്ടർ എം എൽ അനൂപിന്റെ നേതൃത്വത്തിൽ ഉള്ള പോലീസ് സംഘവും, സ്റ്റേഷൻ ഹൗസ് ഓഫീസർ സി പി ആനന്ദന്റെ നേതൃത്വത്തിൽ ഉള്ള ഫയർ ഫോഴ്‌സ് സംഘവും സ്ഥലത്ത് ക്യാമ്പ് ചെയ്ത് തിരച്ചിലിന് നേതൃത്വം കൊടുക്കുന്നുണ്ട്.