ബന്ധുക്കളും നാട്ടുകാരും തീ തിന്ന പതിനൊന്ന് മണിക്കൂറുകൾ; സർവ സന്നാഹത്തിൻ്റെയും സഹായത്തോടെ തിരച്ചിൽ; ഒടുവിൽ വടകരയിലുണ്ടെന്ന് വിവരം, ആശ്വാസം

പയ്യോളി: ബന്ധുക്കളും സുഹൃത്തുക്കളും നാട്ടുകാരും തീ തിന്ന മണിക്കൂറുകൾ. രാവിലെ മുതൽ സർക്കാർ സംവിധാനങ്ങളുടെ ചടുലമായ ഇടപെടൽ. എം എൽ എ മുതൽ നഗരസഭാംഗം വരെയുള്ള ജനപ്രതിനിധികൾ, തഹസിൽദാർ മുതൽ വില്ലേജ് ഉദ്യോഗസ്ഥർ വരെയുള്ള ജീവനക്കാർ, കോട്ടക്കൽ കുഞ്ഞാലി മരയ്ക്കാർ ഹയർ സെക്കണ്ടറി സ്കൂൾ അധ്യാപകർ, നാട്ടുകാർ, മാധ്യമ പ്രവർത്തകർ ഇവരൊക്കെ രാവിലെ മുതൽ തുറശ്ശേരി കടവിലായിരുന്നു.

തുറശ്ശേരി കടവ് പാലത്തിൽ ഉപേക്ഷിച്ച നിലയിൽ കാണപ്പെട്ട സൈക്കിളും സിം കാർഡ് എടുത്തു മാറ്റിയ മൊബൈൽ ഫോണും പണമടങ്ങിയ പേഴ്സും അയനിക്കാട് നിന്നും കാണാതായ പ്ലസ് ടു വിദ്യാർഥിയുടെതാണെന്ന് സ്ഥിരീകരിച്ചതോടെ ഉദ്വേഗത്തിൻ്റെ നിമിഷങ്ങളായിരുന്നു സംജാതമായത്.

ഒടുവിൽ, പതിനൊന്ന് മണിക്കൂറുകൾക്ക് ശേഷം വടകര താഴെ അങ്ങാടി മുകച്ചേരി ഭാഗത്ത് നിന്നും വിദ്യാർഥിയെ കണ്ടെത്തിയെന്ന വാർത്തയെത്തിയതോടെ മനസ്സുകളിൽ ആശ്വാസത്തിൻ്റെ തെന്നൽ വീശുകയായിരുന്നു.